現年55歲嘅黃德斌最近可以話雙喜臨門，除咗有份主演嘅電影《逆流大叔》賣座、備受好評，近日仲求婚成功，正式同39歲圈外女友黃美恩（Joyce）入紙註冊結婚！雖然佢地二人年齡相差16年，但拍拖拍足17年。甚少傳出緋聞的黃德斌曾公開表示，希望事業有成後迎娶女友過門，而佢離開無綫後發展都唔錯，到近日終於兌現承諾，拉埋天窗！
被問到求婚過程，黃德斌表示並無專登製造驚喜，無送花，但有送戒指求婚，不過隻求婚戒指喺兩個人一齊買，仲笑言：「可能佢匿埋喊」。黃德斌仲話會喺香港簽紙，婚事會一切從簡：「唔會擺酒同度蜜月啦，只會同屋企人食餐飯，唔駛擇日，簡簡單單，低調處理」。至於生小朋友，德斌就直言養育小朋友好大責任，所以暫時未有計劃。
其實黃德斌同Joyce拍拖呢17年來，恩愛到好似「老夫老妻」咁。黃德斌喺演藝圈捱咗咁多年，由臨時演員演到男主角，可惜有名無利，事業低迷嘅時候，幸有Joyce不離不棄，一直默默支持。而黃德斌都好疼惜女友，幾年前更不惜打本出資十幾萬，俾Joyce喺尖沙嘴利時商場開設時裝店Flame，德斌唔洗開工嘅日子，除咗會幫女友睇舖，仲會落手落腳幫女友去長沙灣等批發商攞貨，兩人互相扶持，關係有如老夫妻。
圖片來源：互聯網、黃德斌@微博