有家長走來和我從訓練個仔面試，談到教仔的方法。他向我訴苦說他知道教仔有兩種方法，一種是「批評式」：找出孩子的缺點來斥責；另一種是「讚賞式」：找出孩子的優點來褒揚。他用後者來教仔卻失敗，因此他希望我「指點迷津」，找出他教仔錯在什麼地方。以下為我們的討論記錄。想知道家長錯在哪個地方，請細心閱讀。
「趙」為本人 「家長」為焦急的家長
家長：我知道教仔最重要是和個仔打好關係，不是從佢嘅表現「挑骨頭 」，因這樣做會使他反感。
趙：同意。舊式教仔法受中國古訓「棒下出孝子，嚴師出高徒」影響，主張用批評、斥責方法來教仔，新教仔法卻完全相反，用讚賞、呵護來教仔；咁樣容易同個仔建立良好關係。
家長：我便是用讚賞方法來教仔。我同個仔建立良好關係但佢嘅成績卻每況愈下。
趙：每況愈下？應該不會的。可否舉例解釋你點樣用讚賞方法來教仔？
家長：可以。我個仔每次測完驗都派試卷俾家長過目同簽名。在第一次個仔嘅數學測驗中，佢取得100分，我讚佢聰明；但係在第二次數學測驗，佢只取得90分；我笑一笑，唔知點講好，佢好尷尬的把試卷放回書包。喺第三次數學測驗，佢只得80分。我問佢點解會咁樣？是否沒有溫習？他點了點頭，粒聲唔出。我是用正向方法教佢，但佢卻用節節敗退嘅成績「回報」。我做錯了乜嘢呢？
趙：其實讚人都有藝術。讚錯咗比不讚更差。
家長：佢數學取得100分我讚佢聰明有數學天分有錯嗎？
趙：你讚佢聰明、讚佢先天異禀係有問題的。美國史丹福大學著名心理學家心理學教授Carol S. Dweck卡蘿．杜薇克做過一個實驗，證明讚人聰明，增加被讚者嘅壓力，令佢緊張及不思進取，而讚人努力則恰好相反。杜教授嘅實驗搵咗400個學生，在第一關叫佢哋做完一個拼圖遊戲之後，用兩句不同嘅說話讚學生，有一半學生聽到「哇，你一定係好聰明。」；另一組學生聽到「哇，你一定係好努力」； 將兩句讚賞說話植入學生心裏後，佢隨即分咗兩組，前者是「天才組」，後者是「努力組」。之後學生便要過第二關，在這關，學生可以選擇比較難或者比較易兩種題目；教授發覺天才組的學生有三分之二選擇比較易嘅題目，可能因為佢哋唔想冒失去「聰明」這標誌嘅風險；但努力組嘅學生有九成選擇了比較難嘅題目，因為佢哋想證明自己真的很努力；到第三關，這一關題目嘅難度與第一關相同，喺這一關，「聰明組」嘅表現和第一次測驗比較下降了20%；「努力組」卻上升了30個%；整個測驗，顯示失敗對努力組有實質嘅鼓勵作用，而被讚聰明組卻因壓力和面子妨礙咗佢哋嘅進取心，故此成績滑落 。
家長：原來讚兒子聰明，潛在嘅意思是令他有偶像包袱，窒息同妨礙咗佢努力學習的動機，令佢以為我（先天）咁叻唔使（後天）努力， 因此就放軟手腳，此之謂聰明終被聰明誤啦！
趙：正是這樣。所以，身為父母嘅我哋，應表揚佢嘅後天努力，而非先天嘅聰明，因為先天不能用努力補救，後天卻可以。所以我哋不要讚子女叻或聰明，而應讚他付出嘅努力。
家長：係囉，佢第一次數學攞到100分我讚佢叻，但第二次佢攞到90分我都唔知點讚好，我冇理由話佢唔够聰明㗎。
趙：就喺，因為聰明是先天的，一是有，一是冇，亦不能用後天補救或搭够，所以，你一讚佢聰明便封了自己後路，下一次佢取低過上次分數你便尷尬了； 最安全都係讚佢勤力、努力、用功 ，因為就算第二次佢低分，你可以叫佢加倍努力，用心啲，上堂集中精神啲，下一次佢成績好番，便表示你嘅方法正確，而佢，亦自然會聽你話。
家長：明白，原來讚人都有藝術。
趙sir：冇錯，讚得好，會進步，讚不好，一團糟！