有家長走來問我面試拍短片呈交幼兒園的問題：「趙Sir，我想知道，如果新冠疫情在香港繼續，報考幼稚園K1，亦有可能要呈交短片，咁幼稚園K1短片與N班短片是否一樣拍法？如果唔係，又有何不同？原因何在？」如疫情繼續，以上情況極有可能發生，所以用了些時間和家長討論，有興趣知道N班與幼稚園短片不同拍法的家長，宜細讀以下內容。
趙為本人 家為家長
家：N班同K1拍短片，有哪幾方面不同？
趙：不同在「語言運用」、「身體靈活度」及「經驗」。
家：可否舉例？
趙：可以，報讀N班的小朋友剛剛識講，至多講單字，但係報讀K1的小朋友已經識成句成句咁講，表達到自己的意思，這是「語言運用」分別。至於「身體靈活度」方面，一歲小朋友剛剛識行，兩歲小朋友應該識跳、識跑了；至於經驗，更加冇得比，一歲小朋友，係「一飯」咁，乜都唔識，兩歲小朋友，醒目好多了！
家：語言表達會影響短片設計嗎？
趙：會！在N班短片，我會要求小朋友講少，做多；在K1短片，我會要求小朋友講多些也做多些。
家：咁樣，假如短片要求我七分鐘內表達「小朋友在家停課的生活」，我可以點樣拍？
趙：好，我會把短片分四個部分，N班同K1短片第一部分都係「自我介紹」，N班由媽媽「訪問」小朋友：問他的名字，年歲，喜歡食什麼生果；而K1則可以由小朋友自我介紹了，除非佢特別怕羞，如果唔係，自我介紹可以顯示他的「真性情」。
家：明白，咁其他三個部分又如何？
趙：第二部分N班同K1一樣，係「動態活動」：跳舞唱歌，N班短片只唱最淺ABC song，Happy Birthday to You；K1則唱London Bridge is Falling Down，This Old Man等。N班跳舞只需左右搖擺便可以；K1則前後左右都要做足了！這個部分佔兩分鐘。
家：第三部分是否N班同K1一樣？
趙：不是。呢個部分，雖然主題一樣，係「靜態活動」，但內容不同，N班條片係拍家長與小朋友玩Lego，砌圖同積木；K1條片係拍家長和小朋友傾偈，大家講講當日發生開心或感恩事情，例如媽媽可以話買到兩盒口罩，囝囝話結識到一個新朋友等，這個部分亦佔兩分鐘。
家：好！第四個部分又拍乜？
趙：第四部分N班同K1都係拍Bedtime story（上講故事），N班由媽媽或爸爸朗讀故事，K1則除了由媽媽爸爸朗讀故事外，囝囝都會朗讀，甚至大家分享故事內容，這部分也是兩分鐘。你會發覺以上四個部分，有一個主題，那便是「溫馨的家庭」，而這個家庭的活動，包括「自我介紹」，「動態活動」，「靜態活動」及「講故事」，這四項都有助孩子均衡發展的！
家：明白。趙Sir的介紹內容豐富，而家我識得點樣拍短片了！