Advertisement
趙榮德.升學有道

趙榮德:中學自行分配派位未獲通知仍有大把機會

專欄
2023.04.07
撰文:趙榮德攝影:Delan Chow

whatsapp-image-2023-04-04-at-7-04-19-pm有位兒子參加中學自行分配派位的家長,在3月31日未獲通知,忐忑不安的走來「問道」於我。以下為本人和該家長的對話,未讀過中學學位分配辦法簡介或讀過也不明所以的家長宜仔細閱讀以下對話。希望讀完能幫助家長放下「轉校」及「填表」的心頭大石。

趙為本人  家為坐立不安的家長

家:趙Sir,我在3月31日接到教育局通知個仔被取錄,是否表示個仔申請自行分配個學位希望全無?

趙:未必。不過,在答你這個問題之前,我想知道你有否同個仔報直資中學以及該中學是否已取錄你個仔?

家:有報呀!我仲同佢註咗冊,連《家長承諾書》同《小六家長資料表》都交咗俾學校。

趙:咁,你是否好鍾意嗰間直資中學?換句話說,如果三間中學排位,一間是你已註冊的直資、一間是你自行分配選的第一選,一間是自行分配的第二選,你最鍾意邊間?

家:我其實好鍾意自行分配嗰兩間中學。直資嗰間只是用來買個保險。

趙:其實3月31日嘅通知,只是個「初步消息」,不是最終結果。舉例,如果有位申請者既申請直資嘅拔萃,又喺自行分配申請咗津校喇沙,而喺3月31日前,拔萃放榜話錄取咗佢,就算佢喺自行分配申請咗喇沙,都一定去拔萃註冊,因為佢要七月先知道喇沙是否會收佢,俗語話「一鳥在手、勝過百鳥在林」,人之常情也,但咁樣做,佢無形中將喇沙呢個學位放出來俾自行分配不獲通知者。此其一,還有通常面試表現出色嘅申請者,多數第一同第二選擇都考到嘅,如果佢第一個選擇係喇沙,第二個選擇係華仁,這申請者選了喇沙,便要放棄華仁。咁教育局又可將華仁派俾之前那些不獲通知者。所以就算你目前無接到電話,並不是表示個仔機會全無。

家:你意思是個仔可能仍然有「執死雞」的機會?如果要把握這機會,幾時要行動?

趙:教育局公布要在4月12日或之前到已經註冊嘅中學取回《家長承諾書》和《小六學生資料表》的正本,咁樣就可以保留在自行分配學位階段成功申請嘅學位了。

家:明白。如果自行分配真係派唔到,咁點樣申請統一派位?我聽說中學嘅統一派位同小學有好大不同,係咪真嘅?

趙:係呀。小學統一派位是不計成績計運氣、中學是先計成績定咗學生banding(組別),然後才用大抽獎來決定在該組別選校的先後,抽到細嘅數字便先揀,大嘅就後揀。

家:咁Banding點決定?

趙:Banding係由教育局取全港各小學五、六年級嘅校內成績、然後將那些成績標準化,再用俗稱編班試嘅「中一入學前香港學科測驗」抽樣成績嘅平均成績調整校內成績,再由電腦將全港學生經調整後的積分按高低排列次序,然後平均劃分三個全港派位組別,上面嘅三分一是Band 1,中間三分一是Band 2 ,下面三分一係Band 3 。

家:似乎好複雜。咁點樣填先啱?

趙:最好先選子女所屬校網的心儀中學,再參考《中學一覽表》,看看各學校可派發嘅學位,計算被取錄機會。不過,無論如何第一個選擇應該揀最心儀中學,第二個選擇便應該保守啲,因為如果你運氣好的話,個仔應該已經被派到第一個選擇了。

家:明白,多謝趙Sir詳細解釋,令我茅塞頓開。 趙:不用客氣,希望以上解釋幫到你。祝你和你個仔好運!

 

星級企業大獎2020 姜濤 莫文蔚
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹