包圍酒店望出去應有盡有，人氣地區，離中國城二十分鐘車程，五十年前同學開車過來利物浦，披頭四的上榜歌，隻隻歌識唱，如今四個死剩兩個，比我大十歲八歲。孝活和阿Pam關心那海濱舊建築「海上商城」，列入世界遺產，不夠十數年就瀕臨除名，覺得匪夷所思。大家快手抹面沖涼，親家奶奶記掛好姊妹押送Pam父去了機場，渴望一起去船塢散步。差三十年歲數是比較實用，兩個後生已在手機追蹤到哎吔家姊的位置。住客較歡迎酒店燙手的三文治，爭領一份向海旁而去。
哥本哈根的美人魚銅像，這裏都有個老貴婦呆坐，毫無不甘寂寞的姿態，三人鬥快上前相認。
「做乜返咗嚟喺度發吽竇呀？大風呀！」
「我都唔知幾開心，想嗰樣得嗰樣，個世界唔收留嘅人，總算個天趁早收番佢，你睇吓你，噚晚仲都面青口唇白，今朝咁早就同佢哋出嚟晨運添……」
「我今朝仲最早起身，煲粥俾你哋食，先醒起你實係仲喺機場，酒店啲三文治仲熱，你食兩啖……」
「你哋幾隻嘢，做乜烚熟狗頭咁呀，阿素芳，佢哋見親我，就皺定眉頭先，你都知我幾巴閉……」
「我哋個個驚冇咗你，我哋唔知點算之嘛……」
「呢個我嘅哎吔細佬，你嘅親家，你個女嘅老爺，把口係就係唔收，但佢句句都係真心，又俾佢講中我，我喺返嚟架車，個司機話，如果我唔趕，咁早交通好暢順，佢可以車我四圍兜吓，有一笪嗰區叫乜嘢Baltic Traiangle，去到我一定要落車影番張相……」
「係呀，嗰度呢幾年先至旺起上來，有個本地畫家，響啲大貨倉外面，啲紅磚牆，畫咗一對好大嘅翼，即刻就大把人注意，啲貨倉任由啲藝術家乜都得……你有冇影到相呀，俾我哋睇吓？」
「我頭毛髻仔吹到散收收，梗係唔影喇，但我叫司機打個地址落我手機，你哋四個咁人齊，噚日斟茶個個手騰腳顫咁，晏啲我要捉你哋去影一張。」
「哎吔，阿Howard爹哋，爭阿親家奶奶冇嚟到，怕佢唔鍾意。」
「佢都未嫁我，或者佢反口呢……哈……」
「作死呀你，當住個仔同新抱，咁都講得出口。」
「唔驚，而家乜都視像當真，一陣我同阿Pam用手機斟番杯茶俾阿Maria姐姐，得㗎啦，佢好睇得開㗎。」
愈講愈興奮，連隨就去影比翼雙飛雙重意義的紀念作，為怕親家又試休克，捉她回酒店小睡。我又遍尋瑪莉亞作海外報告，適逢ＢＢ今日又有時裝廣告照通告，還要分飾孖生的小孝活和碧翠絲疲於轉裝。原來哎吔家姊永世品性難移，永遠都不是為己，都是分心為人，又吩咐師弟將兩粒人仔，用電腦付諸那個想創個心的畫面。