最後一站就是大結局的車程上，得聞東北面鎮仔阿斯克雪崩傾瀉，有死有傷有失蹤。孝活照常若無其事，我問心十幾個鐘頭就上飛機，對這個看落平定有格的國家，但屠殺，暴動，罷工，天災，政見搖風擺柳；失驚無神的異數，與公眾假期的密度有得揮，乖仔射籬眼見我聽見這則新聞就不停藐嘴藐舌，知父莫若子，精叻到另起高潮：「估唔到阿肥仔，仲咁記得我，仲係咁黐身，搞到我走咗之後，下次再返嚟，最好都係唔俾佢知……」
「佢聽到你講乜㗎。」
「有咁叻就好啦，肥仔呵？」
「狗唔識講人話，唔等於佢哋唔識聽人話，你睇吓佢，頭耷耷㖭啦。」
「我哋返到入屋又要執吓啲行李，佢實知道我哋做緊乜嘢……」
「其實你冇諗過帶埋佢返去？」
「換咗笪地方，佢未必仲係嗰隻狗，我都未必一樣係而家嗰個我……同見返你都係喇，我當時預咗見咗你一面，大家冇乜兩句，頂多一個禮拜就走得，點知你已經唔係以前嗰個你，跟住仲有咁多密質質嘅古仔發生……」
大家都沉默到各有各不知在想什麼。手機接着就響，似足那些得個快字，不能有冷場的電影。
「山崩塌屋嗰度唔近你哋住嗰度吖嘛？」
「講咗話，輪到我返到去浸住熱水至同你講數咯，破壞氣氛喎你。」
「我係奴婢之嘛，阿皇帝你唔急，你個皇太后急呀，佢係都要我哋大陣仗呀，我邊夠佢講唧。」
「學佢咁，咪即係大排筵席，但等於你成日最驚做劏豬凳，局我行先一步瓜老襯囉？」
「我都唔想，係你先至識扭六壬，搞得掂佢嘅，我話你一到埗，就親口同佢交代喇。」
「咁騰雞做乜唧……嗱，你話我會跟足佢一模一樣，記住話『一模一樣』，叫佢唔好反口就得㗎啦，信我，我交俾我個代言人，阿易孝活先生，勞煩你吓。」
「喂……咪住喇……」
「阿Maria姐，好簡單，我哋新航聽朝早十一點，去到吉隆坡，你哋都係朝早九點半左右，爹哋想你帶埋阿ＢＢ嚟接機，咁樣就得㗎嘞。」
「最緊要嗰句你都未講。」
「係，唔使驚動阿Auntie……」
「點解唧，佢好醒目㗎，有乜𠵱郁佢都估到㗎。」
「你俾我一陣浸熱水暖笠笠至同你講好唔好呀？點解ＢＢ唔一齊講電話呀？」
兩仔爺把手機接來接去，我將伏在椅背的赫斯基肥仔塞去手機前面，ＢＢ出現卻將熊仔同時把關，肥仔與熊仔對峙，笑聲不絕。我也加盟不知天高地厚的下一代。
最後一晚在奧斯陸，浸在浴缸想的是……我愈老愈生性，為何孝活足足有幾年音訊全無，我做得出毫不上心，如果他不是大難不死，我會照樣當生少一個，照樣做人臭檔過日辰……何解他肯出現，話走話走，次次借啲意都冇走到，今日喺車佢講得啱，我逐漸變緊，佢等於唔聲唔聲，教番好個老竇，唔怪得之，連隻狗阿肥仔，都一直掛住佢……我記得有一晚，他例牌讀一段書我聽，預我猛打呵欠就入睡，我戴上眼罩，愈聽愈有意思，我貪得意，開始扮打鼻鼾，知道他熄燈，到我真的想搵周公，他就忽然發聲：「我廿幾歲嗰次發脾氣話要離開屋企去玩幾年，但你同媽咪冇嬲不特止，仲覺得我似你哋，話咁先至有性格，我好嬲，我離開你兩個係唔想似你哋，我當自己去第度，重新試吓做另外一個人，唔容易，點會咁容易……」
廁所外面的孝活，天寒地凍，還在與狗在踢球，聽得出撲來撲去的肥仔，很珍惜有這種不知還有沒有下一次的機會。