「PKY2」這個樓下大門的密碼，只有哎吔家姊、進駐大馬的師弟黃天蕩、來收拾及煮兩餐的鐘點大嬸、蓋大班的伙記，都記得「二撇雞」這個提示，兼自出自入。當然，還有大眼ＢＢ的阿嫲宋瑪莉亞，良性冷戰超過一個禮拜，她比較佔上風的是，派出親善大使，一來到就在我的牀上跳來跳去，還有力度拉開雪櫃門，摸到冰凍的啤酒罐就扮尖叫。
今日哎吔家姊先斬後奏，以迅雷不及掩耳就接應衰女醫沙包突擊出現，趁我近來個腦懵懂就無新仇舊恨，我很慶幸男人有一道天賜板斧，永不流失的叫做郎心如鐵，閃身按密碼上樓㷫熱牛腩麵加麻辣油完事洗碗，頂多八分鐘完事。戴耳機除褲不分先後就跳上牀，肚腩愈來愈大。家姊分秒必爭，一開門就捧着必勝的武器大眼ＢＢ作為人質直闖過來，面皮厚的衰女醫沙包扮作亦步亦趨，哭笑難分。
家姊永遠有她雙重作用的開場白：「ＢＢ妺，餵你啲牛奶糖阿Uncle食喇……」跌撞仍要跑的人仔，猛想跳上牀沿把糖遞給我，我也拿出恰到好處的表情，把頭跌落去含實她的手指，我還是無心的看到房門口，那個又妒忌又強顏陪笑的衰女包，我就透心涼。「呢度好就好，但西斜都曬到挨晚……」對家姊的飛鏢，一定要及時一手接過，兼溫文地放在袋裏做紀念。「呢種日光浴好呀，唔使搽太陽油呀……阿師弟話鍾意一世留响大馬，叫我一世都住响度……」
「黐線，做乜郁啲都要講一世唧，呢度好還好，累你岔錯腳，好彩冇穿冇爛咋。」
「大難不死，唔係必有後福咩？」
「但你同你個Maria，就好地地無情情硬晒軚吖嘛。」
「唔見之嘛，又唔係一世。」
「又講一世嘞。」
「如果當陣時，唔係佢驚我有事，走嚟見到叫救傷車，仲識得打電話去大馬叫你唔使擔心，唔使趕返嚟，我仲想點？唔通望啲唔等使嘅人，個幾月之後，唔知係啱啱瞓醒吖，定抑或遊車河經過呢度呢呵？定係我死咗七七四十九日啱時候呀？」
「細佬你唔好咁喇！」家姊見房外的人懶激動，拿手巾抹鼻作狀找方向離去，立即補飛，「阿Isabelle，等你Daddy瞓吓晏覺，今晚我過去聽濤邨同你食飯……」對方用腹語般回應，特地加送向ＢＢ用手拜拜，小人仔視之如隱形，飛跑而過，與我心靈相通，應得到現金獎勵。家姊送人出去，咦哦必然。回來走來我牀邊痛摑我大腿，「你洽啲傷殘人士，我隻腳未好返嗰喎。」
「你做乜咁衰格。」
「唔好再打啦吓，ＢＢ你睇吓婆婆幾惡。」
「你個女都明知你幾唔好老脾，仲親身預咗你抦佢，你赦吓佢，聽吓佢想點得唔得唧？」
「我唔係快餐店幾廿蚊一粒鐘㗎！呢幾個月我見親都係得你哋成班，個個都係濕滯嘅女人，惹到我都確診咗，冇得醫呀。」
「你入埋我數咁話囉喎。」
「我唔敢，阿聖母。」
「佢啱啱離咗婚咋，啲贍養費又未打得贏官司，得一嚿錢都搭夠去斟嗰間舊屋，預你得閒去抖吓呀……休養吓呀。」
「呵呵，咁感人，邊兩句係你幫手加上去㗎……ＢＢ，ＢＢ救我，婆婆又打我呀……」