舊年在香港青山，孝活遲遲未返回去奧斯陸，夜晚他情願瞓地下，總要睇一陣書，累我要戴眼罩，我貪高興叫他次次禀神咁，讀出聲吟幾段等我聽吓，我就會更快見周公，但結果適得其反。他兩兄妺自出世，都未入睡前聽過我這個老竇講半隻古仔，如今到這個幾乎四張的乖仔，催眠失敗，但晚晚都有聽到，想追到除眼罩，想坐起身，的各種題材，好多時我也情願詐諦瞓着，免他讀到口乾要飲水。得知孝活同阿Pam其實飯局不歡而散而趕入來小鎭，倒不如叫旅店的特色燒烤恭候，這個空檔又斷不能夠鐘數「衣泣」，索性兩個搵無聊過無聊的事頂檔。
「我一讀完商科就擒擒青出嚟搵錢，啲財經客鍾意啲serve佢哋個Account嘅女仔，又要醒目，又要四正，我上面個老虔婆，話個個客都讚我對手靚，監我記得修甲搽到靚靚至好返工，我嗰陣要儲錢，阿媽係寡母婆，唔使捱到咁慘，所以，每朝起身返工前都要搞靚雙手至衝出門口，我真係使一毫子嚟扮靚都唔捨得。」
我甚少不插嘴，由得她用我背脊做墊來為指甲上色。
「不如你同我搽隻右手吖……」
我又不反問就捉她右手來「較飛」。
「你好少眼定定咁，乜都唔問我點解……」
「我諗起阿Howard講過本書我噏唔出係乜嘢名，係講一對去度蜜月嘅男女，完全冇得做最想做嗰啲事，因為去到一個海灘側邊，訂咗間酒店仔話冇佢哋嘅登記，佢哋唔知點算，就喺嗰個時候，後面冇幾遠，係條好窮嘅村仔，含含聲好大火，但呢邊酒店所有嘅人若無其事，食嘢嘅食嘢，飲酒嘅飲酒，跳舞嘅跳舞，話知冇幾遠，好多人叫，喊到震天，但呢兩公婆，唔理自己啲行李，走過去幫成條村啲人救火，當正自己係呢條村嘅人，最尾，女嘅衝入間屋，抱番個幾個月嘅ＢＢ出嚟，個老公就救到嗰家人一隻乜都肯做嘅羊仔……」覆述孝活這個故事，剛剛油完一隻右手。
「如果係你個仔講俾我聽，我會又試喊唔切，但係講嘅係你，我會好開心，因為真係唔信我隻耳，你睇吓，你油隻右手，靚過我油隻左手幾多……」我已經慣了有預感，這時一定有人來敲門。兼且敲門的力度十分瑣碎。
門一打開，只有兩呎高，整套西装皮鞋，打了褒呔的男童就衝進來，攬攬我的腳抹嘴，再走去鑽瑪莉亞的肚皮，見到我剛坐熱的搖搖椅還在一高一低郁動，我們女扮男裝的ＢＢ妺，飛身爬上去，正式登基。故意留後的一啤閃進來，「Maria姐姐，你唔使驚要儲定錢俾佢第時讀書，阿Mary姐今日又為佢搵到份合約，有間男女童裝嘅公司搵我哋呢位BeatriceＢＢ，由而家開始，由一歲男仔女仔嘅衫，一路大到四五歲，都由佢做代言人，你可以提早退休……」
「吓？即係佢養我？」
「你慳儉啲，索性養埋我咯。」
孝活最有分寸：「我知老竇你哋兩個唔會鍾意ＢＢ咁細個已經變成咁。」
「咁頭先我哋特登激我屋企阿Daddy同佢個癲婆嗰樣嘢，你哋兩位唔好當真喎。」
「唔怕，老竇之前叫我哋想點就自己揸主意，阿Pam講明，結唔結婚都唔會生細佬哥……」
「但你跟手話，我哋好想契咗ＢＢ做我哋個女……嚇到佢兩個當堂擘大口得個窿……」我和未來老婆很鎮定，「難得你兩個隨口噏，又都幾好，我哋兩個就諗唔到咯，再一家親啲添，Maria呵？」