假如我又再不小心瓜老襯，返魂無術，最好一件東西，一個願望，也沒有留下給其他人去收拾。
近日哎吔家姊出沒過多的頻密，令我心臟衰弱。往時每次見她閃身降臨，就似小孩等到有人來派糖，我會當自己是占士邦，女老細M16夫人又來派筍盤任務。自從蓋大班潛逃後，我們這些大配角就大起大落，蓋太后也維持不到aging gracefully，眼肚有四個，假髮也戴到甩甩漏漏。今早的常客不是她的，要鐘點大嬸落樓開門的稀客，是帶來兩底大菜糕的補習姐姐。
「阿易老闆早晨， 你好返晒未呀？」
「你點知我有事？」
「阿Benedict同我都有通吓手機……佢有叫我得閒整啲大菜糕俾你同佢嫲嫲食……」
「你肥咗喎……唔係大肚吖嘛？」
「吓？我……唔會咁大膽……」
「我嚇吓你啫！」
「你得閒麻煩你託佢哋啲司機扐返去俾阿老人家……」
「阿Ben仔屋企呢排……佢怕者都唔會咁易返嚟香港……」
「我明嘅易老闆……我走先啦……你哋個ＢＢ仔好得意……拜拜！」我起身也不察覺阿嬸有順手帶大眼妺過來，鬼掩眼的是，看着ＢＢ騰騰走入廚房，明顯是有人影坐在裏面，連掩門離開的補習姐姐，也避過一眼回看到廚房的情景。這種畫面多少都有些翳悶，我挽起大紙袋，大踏步行入廚房，不做任何吃了一驚的反應，ＢＢ伏在婆婆的小腿，像在練閉氣的哎吔家姊，手有未點火的香煙，猛在掃人仔的頭。平時兩個人會鬥快開口，今日有大菜糕做動作，索性大啖大啖的鋸開來吃。很作狀的文藝片。
大馬師弟黃天蕩旨意我譯英文歌詞，我就旨意他解剖四隻字四隻字的成語。養兵千日，用在一朝，問過他什麼是欲蓋彌彰，適用於近日心神恍惚與我叮噹馬頭的家姊。西斜時分，又未經我同意，就叫蓋大班馬仔交來乾洗好的西裝，又聲言等我幾耐都可以，一起前去開心一下，還派兩粒定心丸，見的人類除了她是女人之外，其他都是男人，兼買一送一。這麼近那麼遠，要去隱世的別墅，不約而同，我衝出車廂，他衝出大堂而來，兩人任打任攬，笑到牙肉都見晒。沒有蓋紀大班這個哎吔兄弟，我茫無頭緒的半年，誰有法術為我改寫。
「仲係咁把炮喎你，溝到個大嘅，仲買一送二，個ＢＢ好盞鬼咁喎……」
「你仲忍把炮喇，偏响咁嘅時勢，先至返嚟打個轉……」
「橫係掂係，我捉埋阿Ben仔，今晚漏夜又一齊飛走㗎啦……老媽子話唔准懟冧你呀！」
「講真吖，愈講愈真吖，冇你冚家個個都對我咁好，我死咗好耐。」
「就係見你咁都未死，點都抵玩冒吓險喇！」
「吓？Tuesday with Morrie呀，阿家姊你老媽，呢排真係失驚無神整兩件嚟見我，同我鞠定個躬咁呀……」哎吔家姊在閣樓像女王般揮手，Benedict像南韓歌手男神般半行半跳，「Uncle二撇雞！」數周不見的太子仔，竟已我一樣高度，「食咗大菜糕未？」
「I’m totally clueless here.You should know better.」人老了，就要甘心被委派做前菜或甜品。