家姊躺在牀上，面如死灰，動彈不得，到我也認為濕滯，令前來探病的ＢＢ妺也少有的木無表情，如果影張硬照，我們三大一細。似十足送終。
午夜在房中看電視經典西片《春風秋雨》，散場黑婦傭人出殯，不肖女追來撲向棺材，喊到呼天搶地，連忙關機。房鐘拍門齊響，怕有噩耗，打大赤腳去開門，瑪莉亞宋和孝活神色有異。「做乜又敲門又撳鐘呀？」「我敲門，佢撳鐘……」「佢……佢唔係話阿Howard呀，我係話阿家姊，啱啱走咗呀？」孝活噴笑起來，「Auntie話想按摩，但唔鍾意啲女人冇力喎，我咪按住先囉，點知按到佢瞓咗，不醒人事，好安詳……」「死咗先叫安詳，叻晒喇你，我灌佢飲水就話熱得滯……走走走，咁你呢？」「我咪湊阿Beatrice返房瞓，想請教吓你Daddy一啲嘢之嘛，好快㗎咋。」「點會好快吖，聽朝樓下早餐見。」Maria不理孝活開這種玩笑，閃身就入廟拜神。
「你唔好以為你家姊病到瘟瘟燉燉，佢合埋眼都捉住ＢＢ對手話，等婆波好番，我先帶你哋搭飛機周圍去玩，唔好跟阿易Uncle同阿烤烤哥哥返去呀，佢兩仔爺大癲大廢，一陣俾拐子佬捉咗你，咁點算呀？」
「我懷疑佢啲耳機係偷聽器，乜佢都知……你又想問我乜？」
「我贊成你兩仔爺一齊返去，唔好前後腳，去到佢大把嘢要執手尾，到佢周身唔得閒……佢呢排對你好到加零一，應該輪到你服侍番佢轉頭。」
「我明，但你有冇聽過邊隻藥，食咗瞓着係唔會發夢嘅……」
「又講咗去邊呀，不過我都唔好有口話你，冇口話自己，醜嘅，就好似之前夢到家姊個婚禮張張凳係吉嘅……」
「你知就好，我前幾晚就發到你企喺疊兩層嘅西班牙別墅，好得戚咁揸住揪門匙……」
「咁係好夢定噩夢呀？或者我半百咯，都仲好頻撲咁帶啲客睇屋呢？」
「我噚晚發到撞機，就唔知我覺得係好事定壞事……」
「你一個人飛？」
「係同阿Howard一齊，瞓醒覺得係噩夢，諗諗吓係好事，如果係佢一個人有事，呢段日子，我幾開心都冇用，所以，情願一齊飛，一齊返嚟，更加唔可以帶住ＢＢ阿人仔飛，佢响個世界，乜都未見過……」
「你啲聲氣轉晒，似臨老至去讀文學做旁聽生……」
每句說話，在牀上對嘴是真心好多，很快，更快，就整晚入睡，都沒有發過一個夢。
晨早就又有人敲門，兩個情況都令我嚇了一跳，回頭牀上的人已經潛逃，門外的是名花復艷，重踩四吋高跟鞋的家姊，「我唔係迴光返照呀，你唔使驚，個護士今朝量過我血壓降番晒㖭啦，你個仔對手真係犀利，吓吓都捉到我啲神經線，我塊面一上粉，我就知我仲有十年八年，快啲落下面食早餐喇，佢哋喺晒度呀，我今朝同你哋做過晒兩仔爺直接返挪威啲機票先喇。」
「哦……」
「你『餓』啲乜嘢，餓都唔可以著住條底褲就落去㗎？」