韓國男星朴寶劍將於明晚假亞洲博覽館舉行fans見面會，今日朴寶劍舉行記者會，率先同傳媒以及粉絲見面。佢身穿灰色西裝到場，見到一班粉絲手持佢親自設計嘅應援燈，即以廣東話同大家打招呼：「大家好，我係朴寶劍。」
朴寶劍指見面會以「Good Day」主題係希望與粉絲度過幸福快樂嘅時間，亦希望有好事發生喺大家身上。其後，佢又用廣東話說「好掛住大家」，大派心心冧粉絲。問及上次來港舉行見面會，朴寶劍表示雖然同粉絲身處兩地，但仍得到大家喜愛同支持，被粉絲嘅熱情感動到眼泛淚光。而主辦方為咗幫朴寶劍打氣，特別送上藍色咪，令佢開心得狂擺甫士影相。
與宋慧喬拍攝完《男朋友》後，朴寶劍被封為「國民男友」，佢即場分享做好男友要具備嘅條件：「要接受對方，多同女朋友溝通同了解佢嘅諗法。」另外，問到朴寶劍將同孔劉拍攝電影《徐福》，佢就話好開心同對方合作，自己會努力演好演複製人嘅角色。