新晉男子組合ZPOT成員BOSCO、IAN HANNZ及MARCUS，於昨日（4日）發動全港快閃活動「BANG IS EVERYWHERE」，將新歌《BANG》嘅爆發力帶到街頭。正如歌詞所寫「不必跟大隊，不必跟公式」，三位成員打破傳統框架與年齡界限，連走三站同大眾一齊炸爆街頭，吸引大批粉絲「Zpotlight」到場應援，場面非常熱鬧。
三子第一站先喺尖沙咀快閃唱跳《BANG》，然後轉戰第二站銅鑼灣行人專用區，三子現場派發限量BANG主題自拍小卡之餘，更聯同11位女銀髮族帶來驚喜快閃合跳，展現「就算碰壁，也要碰得響亮」《BANG》歌詞嘅精神，用熱舞打破世代界限。談到同銀髮族合作，Ian Hannz笑言喺studio教佢哋一班人跳舞時心裏會會心微笑，更不禁想起自己嘅婆婆「小蓮姐」。
Marcus亦顯得非常興奮，指今次係首次喺鬧市Live使出大絕「旋轉360」，更期待下次可以還原MV入面嘅火圈，做一個完整set嘅表演。而Bosco嚟到銅鑼灣快閃就坦言充滿回憶，有種重遊舊地嘅感覺。Ian Hannz提到《BANG》MV入面有不少型爆嘅電單車場面，自爆其實自己真係有去考電單車，不過最後「肥佬」，所以MV裡面嘅帥氣騎行場面只能交由專業人士演出。Bosco透露已邀請不同歌手朋友，除咗師姐COLLAR嘅MARF和Gao外，仲有師兄FatBoy@ERROR、Tsoul及不少舞藝高人一齊拍Dance Challenge，形容呢個係一個「自肥計劃」。至於早前成功向影帝劉青雲介紹ZPOT嘅Ian Hannz，則準備越級接受新Mission，嘗試邀請劉青雲一齊拍攝Dance Challenge！
活動現場三子更透露好快會推出全新團歌，今次Bosco同Marcus繼小組歌後，會再次喺團歌挑戰寫Rap詞。此外，佢哋預告未來會繼續以不同嘅小組形式出歌，並即場解構冇特別起小組名稱嘅原因，令粉絲非常期待ZPOT未來嘅多元發展。
