MIRROR成員邱傲然Tiger拍完《存酒人》後，跟導演盧煒麟Alan有了默契，所以今次推出全新個人單曲《新歌》，就找了盧煒麟再合作，由他操刀MV，「今次真係機緣巧合，傾傾下大家覺得不如即興去東京拍攝。可以再同Alan 合作，我覺得好安心又高興，希望陸續會有更多好作品呈現畀大家。」
《新歌》講述一段遺憾的愛情，男主角深愛對方，卻因外界因素或現實處境而無法走到最後。MV的故事概念講述男女主角均為電影迷，特別到訪多個經典場景致敬；情節帶著淡淡的唏噓，男主角更隱約有種想假戲真做、藉此表達對女方好感的微妙情感。被問到究竟造訪了哪些日劇場景，Tiger想保持神秘：「我哋團隊有個共識，好想將呢個小小嘅任務交畀觀眾，睇下大家認唔認得出邊個場景，歡迎一齊討論！如果講到對我影響最深嘅日劇，真係《悠長假期》，近期我再重溫，無論係演員、音樂定畫面都咁吸引，男主角真係好有型。」
然而，遠赴海外取景難免遇到挑戰，拍攝團隊在抵達東京首日便碰上當地颱風。Tiger回憶道：「我哋抵達第一日就撞正東京打風，攞車之後發現所有高速公路封晒，鐵路亦都停駛。好彩第一日無排拍攝行程，雖然去唔到原本嘅目的地，但最後都順利搵到地方安頓避風，唔使喺機場過夜，算係不幸中之大幸。」除了天氣因素，語言亦是另一大考驗，Tiger笑言：「語言限制令溝通有少少難度，簡單如去便利店買件雞肉都有挑戰性！好彩今次嘅女主角日文非常流利，幫我哋解決咗好多拍攝上面嘅煩惱。」
