溫情家庭電影《OMG！阿媽有喜》近日香港上映，不少網民大讚袁詠儀（靚靚）演出高齡產婦角色，無論演技和外型都恰如其分，故事情節令不少觀眾有共鳴感。而戲中飾演靚靚囡囡的黃潔琪（Miko）也成為焦點熱話，戲中所飾的網紅扮演白雪公主和小紅帽角色，造型可愛，獲得不少男fans點讚，還建議她在網上扮演更多不同的Cosplay角色，讓一眾網民投選心中最愛。
Miko喜出望外表示：「哎呀，我都唔知道原來大家對我戲中Cosplay嘅角色咁留意，自己都覺得好有趣，所以之前首映有網民建議我用白雪公主造型出現，大家都好有諗頭！」至於現實生活中，自己最想Cosplay什麼角色造型？Miko笑說：「其實我冇特別玩Cosplay，所以今次電影裏面嘅白雪公主、小紅帽我都覺得好新鮮，不過卡通人物中我就最喜歡櫻桃小丸子，因為我同佢造型都係齊䕃有啲似，加上面形圓軲轆。可能我哋係失散咗嘅姊妹…哈哈！」
假如要跟靚靚母女Cosplay，哪一角色會適合？她不禁說：「呢個考起我，不過《SPY×FAMILY間諜家》裡面嘅角色，靚靚姐可以cosplay 媽咪約兒，我就扮安妮亞，大家都係齊䕃，我又係好鍾意粉紅色啱晒feel！我都好期待同靚靚姐一齊搵吓Cosplay。」