MC張天賦今年3月30日便出道四周年，繼《說謊者》後，推出今年的第二首主打歌《懷疑人生》，由Wilson Chow作曲、林若寧填詞、Nic Tsui和Larry Wong編曲，以及Wilson Chow和Larry Wong監製。新歌內容有別耳熟能詳的情歌，以「人生」作為主題，帶出許多人甚至是MC自己心中「懷疑人生」的想法與無力感。MC曾分享他於出道前，為生計而嘗試不同類型工作，如安裝冷氣、餐龐廚師、侍應及電話月費推銷員等等，恰巧非常貼切新歌主題，故決定MV故事參考他出道前的真實故事。
MC說 :「安裝冷氣係我返過嘅其中一份工啦，好記得當初係比MV入面辛苦好多，而且多數做都係一啲唐樓或者House（別墅），上去三樓搬吓嘢，洗吓冷氣同換冷氣，搬搬抬抬之後就會發覺，自己背脊多咗好多傷痕，哈哈！」他亦說 :「其實除咗做過冷氣啦、做過餐廳啦，亦都做過介紹電話plan，即係街邊拉易拉架然後等人過嚟查詢，我覺得呢個工作（現實中）比MV入面輕鬆，因為一來其實如果搵街邊嘅人，係可以攞到唔同優惠，同埋佢哋之間亦有好多你唔知嘅程序上玩法，所以基本上坐喺度都會有人埋嚟咨詢，就唔使好似MV入面咁sell客，除非你要追quota啦，不過平時都要（承受）風吹雨打；而餐廳就係因為當時喺一間餐廳唱歌，佢同我講唔夠人喎，你會唔會入嚟幫埋手呀？所以平時會幫手煮意粉、炸雞翼同炸薯條，夠鐘就出去唱歌，唱完歌就會返番入去幫手煮吓意粉，阿Goo（Goo Chan）亦都食過我煮嘅蟹肉忌廉意粉，可以tag吓佢，叫佢覆吓仲記唔記得咩味道？」
問到MC是否最拿手煮蟹肉忌廉意粉？MC則說：「其實餐牌上面食物尚算容易製作，但若問到自己最喜歡的食物，應該算是意粉。」他續說:「如果純粹為興趣的話，我都想鑽研吓煮嘢食，甚至其實我都幾享受喺餐廳煮嘢食，好多嘢要同時處理嘅嗰種繁忙。」
《懷疑人生》是講述成長時遇到很多價值觀的衝擊，令我們會懷疑人生種種的事情，MC亦分享他曾遇過這種情況及他的解決方法，「一定有遇過呢啲（懷疑自己）問題，因為你必須要喺實際同埋夢想中揀一項去實現，好難兩全其美，所以我當時決定，其實都唔係一個決定，我覺得同我性格有關，因為我係一個活在當下嘅人，我可以喺微細地方搵到快樂，所以即使當時好辛苦，我都覺得開心又或者即使幾辛苦都好，busking之後如果我可以買到我想要嘅咪或者喇叭，有人聽我唱歌就開心。」
MC亦坦言成為歌手前的階段，是他人生中「最差」的階段，因為曾經欠交租金及各樣繳款，需要同時做很多兼職賺錢，真的很不容易。他說 :「辛苦嘅，係好辛苦嘅，依家回望返都真係⋯⋯唉⋯⋯盡在不言中，我都好少講唔到嘢。」
MC推出新歌的日子正值DSE（中學文憑試) 開考，MC也有分享自身經歷及鼓勵應屆考生：「可能我講嘅嘢未必啱哂，但我嘅角度，我認為DSE其實只係一個階段，但並唔係會決定到人生之後嘅嘢，之後仲有好長嘅路、好多決定要做，所以唔需要擔心同灰心，只要你有盡過力，唔好俾自己後悔，即使今次失敗都好，呢個唔會係永遠嘅失敗，請你喺呢個失敗入面學習到錯嘅嘢，從而檢討更正！當然都希望每位DSE學生順順利利達到你自己想要嘅目標，攞到你想要嘅分數，入到你想入嘅學校，加油！」
