女子組合COLLAR將在9月11日推出專輯《PERSONA》，於專輯中收錄全新7首歌曲，繼頭炮作品《淚光》登場後，年度第二首團歌《SKSKZAZA》亦於昨日（25日）面世。MV除了到日本富士山附近取景外，更大玩古靈精怪與荒誕玩味，但內裡卻傳遞着「微小但強大」的正面信息，難怪COLLAR成員Marf邱彥筒、Gao沈貞巧、Day許軼、Candy王家晴、Winka陳泳伽、Ivy蘇雅琳及Sumling李芯駖大讚歌曲具有深層意思。
專輯《PERSONA》中的多首新歌MV，均由蕃茄作題引及貫穿，而繼《淚光》有蕃茄出現後，《SKSKZAZA》亦有蕃茄鏡頭，令不少樂迷討論，究竟蕃茄背後帶出甚麼信息？有待揭曉。不過，提到蕃茄，Day透露差點被蕃茄「考起」，她指：「有一幕我同Marf、Gao、Ivy要喺斜坡草地到跳，然後工作人員就掟啲蕃茄落嚟，我哋不斷跳，但個斜坡係好斜，又驚踩到啲蕃茄會跌親。」至於Sumling表示，今次拍攝最難忘，莫過於在草地上被蚊子叮咬後，兩個星期仍然十分痕癢。
過往COLLAR曾為歌曲《idc》到日本拍MV，再次重臨日本拍攝，未知感覺可有不同？COLLAR指今次雖然要在3日的行程拍攝5個MV，但比上次舒服，而且在拍攝的最後一天，還可以齊齊到Outlet血拚，Ivy說：「今次拍攝唔使摸黑開始化妝，已經好感恩。而且拍攝地方喺溫泉區，收工後可以同其他成員一齊浸溫泉，玉帛相見，係十分有趣嘅體驗。最後喺上飛機前3個鐘，我哋整個團隊仲爭取到時間去Outlet購物！」
