現年42歲的陳柏宇（Jason）憑今年第五首派台作品、並首次擔任監製的《不愛無壞》接受雷霆881商業一台《星光背後》專訪。入行19年的他，一直被稱為「樂壇隱世歌手」，曾兩度踏上紅館舞台，三度於叱咤頒獎禮奪得男歌手銀獎（2016、2017、2019），以及一次「我最喜愛男歌手」（2017）。儘管成績不俗，Jason過往卻多次強調不追求「大紅大紫」，樂迷反為他抱不平，2016年網上就掀起「樂壇隱世歌手」討論；今年頒獎季將至，更再出現「關於陳柏宇與男金的距離」話題。
2017年與太太符曉薇（Leanne）結婚後，Jason成為兩名女兒的爸爸，他在節目上坦言，人生排序中事業只是「第三位」：「大紅大紫就要有犧牲，在我人生當中，最在乎唔係事業，事業只係第三位。當你大紅大紫，你嘅工作量越多，私人時間就越嚟越少。我諗將來老咗再睇返人生成就，第一樣唔係事業，而係家庭，係我兩個女同太太。」成為父親後，他更深刻感受到自己追求的生活方式，「我又唔識點搶Fo，又唔識去爭任何嘢，我只可以運用我做歌手嘅堅持。」
不過，年初舉行會展演唱會前，他卻突然訂下2025年目標：「向男金出發」，外界以為他終於「開竅」、重拾鬥心，他解釋：「點解當日咁講？只想畀個目標自己，睇吓自己工作心態會點，邊有話一定攞到？」Jason直言，入行頭六、七年確實會緊張頒獎結果，但後來學懂釋懷：「因為明白件事唔係自己可以控制。某啲年份成績好啲、某啲年份無咁好，就唔係單止我點做，有好多外來因素。既然Majority嚟自外來因素，就唔去過份思考。」
談到曾三奪銀獎、是否覺得曾與男金「擦身而過」？Jason反應搞笑：「吓？三次咁多？我以為得兩年咋！」跟住補充：「講真，無覺得邊年應該係我，有已經好巴閉。金銀銅都好，有得上台已經係開心事，因為攞第四無人知。」外界曾指他未能更上一層樓與宣傳不力有關，他淡定回應：「唔係我哋宣傳唔夠，只係有人更加紅攞到更多曝光。有好新聞發生，我嘅唔夠大，咪睇唔到囉，唔關我亦唔關公司事。」
面對樂壇新秀湧現，他同樣無焦慮，但亦承認壓力存在：「長江後浪推前浪係事實，但屬於我控制唔到。我喜歡默默耕耘嗰一批。」雖被視為唱功認可的實力派，他卻於疫情期間重新拜師學唱歌：「因為唔知點前進，學唱歌先知自己有好多不足，而家係比以前好，但仲有好遠距離先至到我認為叻嘅水平。」
