《中年好聲音3》冠軍黃博，上周日（7日）在《萬眾同心公益金》節目，跟上兩屆冠軍周吉佩和古淖文首度同台合唱，當晚同場的歌手還包括Big Four等。
黃博今日（12日）在社交網，分享當日綵排現場發生的一件難忘事片段，留言：「當日，我正喺現場睇綵排、食緊蘋果，突然間，前輩蘇永康先生主動行過來，表達咗對我嘅鼓勵，我真係太興奮太感激，雖然我食緊蘋果，手不算乾淨，但佢都毫不介意，仲主動同我握手，我激動地同佢講，喺比賽時我有翻唱您首《來夜方長》，佢話知道，仲好暖心鼓勵我！我會記住這難忘而美好嘅瞬間。」
片段中阿博拎住個蘋果咬，吃得好滋味亦好可愛，咬到汁都漏出來，她就用手輕輕抹嘴邊，十足小女孩。她表示：「在等待出場的時候，我經常會食個蘋果滋潤一下喉嚨」，然後見到蘇永康，片段即用搞笑打格圖案遮住阿博個樣，想必當時她的表情跟圖案一樣勁驚訝，再然後就是剛才抺過蘋果汁的手，已跟蘇永康的手緊緊握着，個蘋果就被放到另一張椅上，握完手的阿博才下意識輕搓自己雙手。
