恭喜陳生陳太！
前Super Girls成員陳穎欣（Yanny）出嫁，昨日與音樂監製陳考威（Gareth Chan）在澳洲舉行婚禮，Gareth和Yanny宣讀誓詞時，手拖手深情對望，更甜蜜咀嘴，兼咀到彎腰，晚上一對新人拖手看絢爛煙花，然後二人齊在社交網貼上，新娘子穿上純白緞面平口婚紗，挽着「白馬王子」Look的老公，陽光透過樹影灑落，在眾賓客拍手迎接下登場的照片，宣布：「We are married！」。
除了兩位前隊友蔡明思和吳嘉禧有份擔任姊妹團外，有份出席婚禮的包括MIRROR成員江𤒹生（AK）、陳卓賢（Ian）、梁釗峰、黃偉文、陳健安、余文樂、潘宇謙和Dear Jane成員Jackal等。
Yanny：「好開心到外地舉行咗婚禮，見到好多朋友，大家都玩得好開心，最難得就算唔喺香港，仍然見到一班熟悉嘅面孔，有一種好特別感覺，最特別係一啲移居外地嘅朋友，例如Wyman，甚至乎一啲移居加拿大嘅朋友，佢哋坐好耐飛機嚟參加我哋嘅婚禮，所以好開心，好感動同好感恩。
其實Gareth同Wyman雖然一直有合作，但係都係透過電話同網絡，從來都未見過真人，第一次見面就係嚟參加我哋婚禮。
在場有好多賓客，大家都一齊唱歌、表演，令全場氣氛都好高漲，特別在場嘅每位歌手，都送上佢哋特別嘅歌聲作祝福。
雖然我同Gareth都好攰，唔係好夠休息，好多事要去籌備，好彩有個好朋友幫手搞呢個婚禮，令我哋輕鬆好多，可以盡量享受其中。我覺得最驚喜，係Gareth不停喊，因為佢平時係一個好少喊嘅人，但現場無論進場、同父母說話、影相，佢都好感觸咁喊，令到我都覺得好感動。
我本身認為結婚可以簡簡單單就好了，好多謝Gareth提出一定要搞呢個婚禮，畀我嘅體驗原來係咁開心、咁有幸福感，令到大家都覺得好難忘。」