現年31歲、2019年經環球唱片入行的陳凱詠（JACE），在2023年經歷被公司雪藏及約滿後，毅然決定轉型成為獨立歌手。走過三年自資、自決、自負成敗的音樂之路，她的努力終於迎來重要里程碑，將於2月18日大年初二起，一連兩晚在紅磡體育館舉行《JACE WORLD》首次個人演唱會，正式踏上殿堂級舞台。
為處女紅館騷及剛推出的全新概念專輯《REVOLVING》，Jace接受雷霆881商業一台《星光背後》專訪時坦言，紅館檔期來得突然又夢幻：「啲人成日話紅館期好難批，其實係一年前試吓入紙，完全無諗過突然批咗。」她直言對於傳統檔期與紅館這個象徵性的舞台降臨自己身上，至今仍覺得不可思議。
今次演唱會，JACE更首次「掛帥」擔任出品人，邊學邊做。她感激有其他投資者及一班經驗豐富的團隊支持，令她在重大決定前變得更果斷：「新年開騷有啲似賭錢，唔到跑馬嗰日你都唔知贏定輸，但如果我自己唔清楚、唔識決斷，團隊更加唔知你想點。」真正壓力湧現，是在宣傳及賣飛階段：「開始有人問我有咩驚喜？有邊個嘉賓？好多嘢一齊殺埋身，嗰陣先至感覺到壓力。」
一向被外界視為「另類」、「非主流」歌手的JACE，卻選擇在最傳統的檔期開騷，她索性以自家公司名為演唱會命名為《JACE WORLD》：「我唔想再抽象，想將我嘅世界擺晒喺呢個紅館騷度，究竟係好定唔好，偏鋒定易明都好，都係我嘅世界。」她亦強調自己並非只有另類一面，演唱會除破天荒設有企位，亦會有跳唱及主流大路歌環節，呈現更完整的自己。
正如她剛推出的專輯《REVOLVING》，概念源自徐克電影《青蛇》，作品橫跨偏鋒與主流，包括《大車》、《出事》等實驗風格歌曲，也有《間歇性休眠》、《PTSD》等較大眾化的作品。JACE直言，成為獨立歌手三年來，不斷有人勸她唱多些K歌：「好多人問我點解咁偏，其實我都有啲主流啲嘅歌，但由頭到尾我都無猶豫過。」即使有人提醒她要為將來版稅著想，她仍堅持己見：「如果有Hit歌，過幾年會多謝自己，呢句無錯。但我首首歌都係自己畀錢做，我真係唔理人聽唔聽，表現到我自己嘅喜好，一定緊要過錢！」
談到獨立後的付出，JACE坦言除心血外，金錢上亦毫不手軟，公司至今仍只是收支平衡。尤其新專輯，她幾乎沒有理會預算：「我都有問自己係咪太唔實際亂洗錢，之後問爹哋，佢好Sweet同我講：『做到就得！』仲話生我嗰年都無諗咁多，今日未又係咁大個。」說到辛酸，她指最難捱並非金錢，而是凡事獨自承受：「有啲似孤立咗自己，無人畀到答案，又唔想煩人，條路要自己摸索，會攰，會停低問自己點解要搞到咁辛苦。」
幸而一路走來，她得到不少朋友及父母的支持與鼓勵。JACE坦言，最感動的永遠是父母一句簡單真誠的肯定：「阿女，你好叻呀！」她亦笑言父母曾擔心她搞得太大陣仗，甚至在開騷前，爸爸半開玩笑說要投資演唱會。身為家中獨女，她認為減輕父母擔心的方法，就是坦誠溝通：「有次壓力大到頂唔順，喺阿爸阿媽面前喊咗。其實佢哋幫唔到我解決問題，但我唔想乜都話搞得掂，反而令佢哋更擔心。」
