鍾舒漫（Sherman）最近半自資出新歌，離開舊公司英皇三年後再出發，有新歌又有新公司配合，這三年間，Sherman坦言由個人、香港以至世界都有大變化，面對難關，最緊要學懂「放手」，「呢三年所謂難關，都唔係過唔到呀！我要重新搵自己去向，我唔一定要大公司或者好大團隊，我係搵可以同行嘅人，一齊有默契地行，同行好緊要！」
一切重新開始。Sherman更向本刊首度透露，與導演男友已經和平分手，不過Sherman並不孤單，有信仰支持兼圈中姊妹團相伴，她與胞妹Sukie、衛蘭、衛詩和王君馨的「五人幫」，取名為「YSL」，原來背後有段古。
鍾舒漫在20年7月離開效力了十五年的英皇，宣布回復自由身，適逢這三年間經歷疫情與社會變化，今次重踏錄音室灌錄新歌《What You Get》，正是這三年間的體會，「呢段時期香港都偏向negative，我身邊好多朋友都會負面，有啲就離開香港，對前景冇咩盼望，其他人就要為搵工轉型煩惱！我覺得人有好多創造空間，機會永遠由零開始，如果人生不斷俾環境扯住走，係一件好累好辛苦嘅事，所以我先有呢隻歌意念。我唔知成唔成功，起碼我到到今日呢個MV都拍埋，中間亦遇到好多啱嘅人，我好想透過呢隻歌，去support同鼓勵依家嘅人！」
遇到對的人，容易行好多。Sherman今年簽下新公司「上騰制作」，與當年在英皇的經理人Kitty媽再續前緣，Sherman形容為「家人重聚」，「好多人問我係咪簽返Kitty媽，我話我哋係『家人重聚』。由細到大都叫佢阿媽，呢個係一個緣份。我準備緊呢隻歌嘅時候，突然間有一日，阿媽打俾我叫我出嚟飲咖啡，佢提議一個我哋新的合作方式，依家呢個世界，我覺得合作方式有好多，佢可以用佢個身份幫我去support，at the same time如果有其他合作，大家有自由空間，最緊要我同Kitty媽本身有個好嘅bonding，呢樣嘢錢都買唔到，信任好緊要！」Sherman笑說：「以前我細個，阿媽其實惡啲，我好多時都唔敢太過表達自己意見，依家阿媽收咗火，佢好多時都問我諗法同意見。」
人生最滑稽的事情
這三年間，自由身的Sherman慶幸仍獲不少演出機會，「我感恩呢三年，我冇出歌冇公司，但都有人去接洽我，不斷有唔同工作，雖然唔係話好多錢嘅工作，但一路係足夠，我又未去到有啲好慘嘅故事，我戶口變零呀，我冇去到咁extreme，反而過程當中有好多大小drama發生，我要處理一啲人，跟住再處理自己情緒，呢樣困難啲！」
大小drama的發生，當然是指鍾舒漫21年與圈中人發生金錢糾紛，她入禀向對方追討4萬元，經小額錢債審裁處裁決，鍾舒漫獲勝訴。Sherman坦言，這是她人生中最ridiculous的一件事，她不希望自己的名字再與對方有任何連結，「我覺得人生就係咁，睇下你點樣去面對。以前我偏向唔係好敢，去維護或者企出嚟，去講一啲嘢protect自己，我偏向比較和平使者，唔想有太多紛爭，但唔代表我唔着重公義，如果push到我去一個位，我真係拍枱嗰啲人，但係大部分時間，我都希望大家和平，但依家唔係和唔和平嘅問題，我覺得係respect返自己，that’s why嗰一期狠少少，唔可以將自己壓低喺一個被踐踏位置，公開做呢樣嘢同非公開又兩回事，我公開咗，壓力自然大啲！」
最大得着是，令Sherman勇敢了，「識得愛自己，愛自己就自然會為自己去爭取，唔係搶，只不過企返啱自己位置！」今年39歲的鍾舒漫，05年參加英皇新秀大賽奪冠入行，09年一曲《給自己的信》大熱，今次再出新歌，Sherman仍帶有新鮮期待心情，「我又唔係第一日出道，但我又有一種好新鮮感覺，我反而好感恩，因為我冇覺得做到純咗，我去完錄音，依然我好期待聽錄音成果，排完一隻舞，好期待睇自己跳成點。有時我去school tour，我問你哋邊年出世？知唔知我邊年出道呀？我講完之後，大家喺邊呀？媽咪個肚入面！其實好多小朋友十幾歲，我對佢哋嚟講完全全新，我覺得幾好玩，喺佢哋嘅世界，我好似一個全新嘅人。」
新造的人，Sherman更感恩胞妹鍾舒祺（Sukie）永遠在身邊，「我哋開心唔開心，佢經歷緊大小事，我哋都陪住大家，我哋唔計較，尤其金錢上都唔計較，我要俾你就俾你，佢要俾我就俾我，我有咩都分一半俾佢！好多人好奇怪，點解我哋感情咁好，我就問，唔係咁嘅咩？原來唔係㗎，好多兄弟姊妹關係都麻麻地，我同妹妹要好感恩。我哋都會鬧交，但好快就冇事，將件事變咗笑話就冇嘢！」
因了解而分手
除有妹妹同行，多年來Sherman是虔誠基督徒，圈中有班共同信仰的藝人朋友，其中Sherman兩姊妹與衛蘭、衛詩兩姊妹，還有王君馨這「五人幫」姊妹團，由三年前疫情開始，成為圈中密不可分的姊妹情，「我哋五個由疫情開始到依家，有一個fellowship（團契）小組，王君馨好犀利，佢係一個好有組織能力嘅人，大家姊leader，我哋好似一個family，因為呢行好多嘢你講唔到，冇人明，有彼此支持好緊要。我哋每次都會有Bible study，我哋所謂互相圍爐取暖啦，我哋都有一個正確方向，大家都有好多得着！」
「五條女」原來有個意想不到的團名「YSL」，「我哋有兩個group，首先一個好正經，有其他新加入artist，叫做genesis，即係聖經入面《創世紀》；另外一個group就得我哋五條女叫YSL，你知啦，好多人對於我哋呢啲又藝人又基督徒，好鍾意叫我哋做『耶X』，我哋OK嘅，我哋幾鍾意個名，講笑咁講，我哋就問，咁冇信仰嗰啲叫乜嘢？『冇X』囉！又得喎！我哋五個女仔叫YSL，Y係耶（Yeah）啦、S係Apostrophe S、L就L啦，我哋form咗三年喇！」最近一次在YSL面前講到喊的事情，是Sherman為家庭問題，她希望有一日令父母可以放下擔心，真正做到以她兩姊妹為榮的一日。
說到與導演男友的感情，Sherman首度透露分訊，更說已經分開了一段日子，「依家我係單身狀態。大家經過了解之後，覺得係一個啱嘅時候separate！點解我唔會特別講，因為我一直都唔鍾意講自己情感生活，只不過好唔好彩，你諗下我過往全部（戀情），都唔知邊度爆出嚟！你問到我，我覺得冇問題，當傾偈咁傾，我依家係一個單身狀態，而且我哋關係冇發生問題，因了解而分開！」依然相信愛情的Sherman，仍渴望有個伴，不過她說：「唔係要好娘咁講專注工作，事實真係呢段時間開始忙，情感就順其自然啦！」
場地提供：Mini hotel Causeway Bay
