鍾嘉欣接受新城廣播Christine主持的《可「連」天下父母心》訪問，分享了作為三孩媽媽的日常作息，嘉欣堅持全家早睡早起，讓孩子在返學前，完成部分功課，「我鍾意佢哋朝早做功課，因為腦袋仲清晰，放學後先做功課就會好攰。」嘉欣每日會步行送他們返學，放學後安排玩樂時間，並接送他們參加舞蹈和冰球等課外活動，「返到屋企就立即煮飯，食完嘢又要做一啲功課，然後沖涼同佢哋玩一陣，睇少少中文電視，8點半就上牀瞓覺。」嘉欣大讚丈夫雖然工作繁忙，但會積極分擔煮飯、洗衣和清潔等家務，她說：「我做到嘅嘢佢都做到，我哋兩個都好全面。」
嘉欣與丈夫堅持培養子女的獨立性，要求他們自己著鞋、收拾書包、清潔午餐盒及洗澡等，她笑說：「我本身係個好溫柔嘅人，但做咗阿媽之後，把聲好大，隔三間屋都聽到我講嘢。」談及三個孩子的性格，嘉欣形容大女很聽話，有主見及充滿大家姐風範；兒子則是她的「情人」，但又很固執，經常說出甜蜜的話語；兩歲的小女兒則最野性，「佢好E人（外向型），每個人都係佢嘅朋友，一見到面就好熱情打招呼，好多人都識佢，因為佢好有社交能力。」
將來子女踏入青春期，嘉欣直言會感到傷感，「我個女依家每一日都有變化，表情同回答每日都有啲唔同，愈嚟愈接近冷淡，而家鍾意同朋友玩就唔記得爸爸媽媽，9歲又快咗少少。」嘉欣自爆當年青春期時，十分害怕會來月經，「第一次嚟好驚，我唔敢話畀阿媽知，以為有病，仲靜靜雞去拜神，『我唔可以死，仲要陪阿媽』，之後阿媽見到垃圾筒，就解釋畀我聽，先知原來唔係有病；作為阿媽知道阿女將來會嚟都好驚，想像唔到。」
更多圖輯：
