鄭欣宜（Joyce）相隔5年，昨日（28/12）終於推出新碟《JOYCE TO THE WORLD》，立即懷着興奮又感動的心情，到旺角一家唱片店當客席店員，與歌迷近距離接觸。
Joyce早前為新碟拍攝封面，需要爬上兩米高的道具屋頂擺出各種姿勢，令畏高的她大叫「好驚」，說道：「嘩，好驚呀！雖然好安全，但我爬上去嘅時候覺得有啲搖，原來我有少少畏高，工作人員話已經爬上試咗好多次，確保安全，但佢好瘦，我唔係嘛，我仲要喺屋頂趴、瞓、側身躺等擺甫士，總之步步驚心。」不過當見到照片拍出漂亮效果，她也非常滿意，感覺值得！
Joyce已5年沒有推出唱片，這次會收錄她加入寰亞音樂後的作品，很期待與歌迷分享，「好想話俾鍾意我嘅Fans知道，我繼續有做我好鍾意嘅嘢，我冇放棄，而且有好支持和好懂得欣賞我嘅公司和團隊，佢哋好有耐性咁發掘我唔同嘅可能性，有被寵愛嘅感覺。今日影咗好靚相，每各個場景設計都好靚，所有嘢都好完美，好感恩。」她感覺5年之間轉變很大，尤其是膽子大了，變得勇於嘗試，「以前我係緊張大師，乜都問，每一步每個環節我都要兼顧，好多嘢擔心。但呢間公司令我好放心，我今朝開開心心食個早餐，然後以最靚和最佳狀態到場便可。我好感恩，好多謝大家。」說着說着，她更哽咽起來，「點解咁大感觸？點解會咁嘅？我要投訴呀，影得我太靚，點揀？唔使執都咁有腰，離晒大譜！」
這次唱片封面的設計，加入Joyce最喜愛的風格與顏色，令她感到很有專屬感，格外開心和興奮，「今次每個場景設計都好有心思，用咗好多色彩繽紛嘅布置，尤其是屋企門口，用咗我好鍾意嘅粉紅色，我好鍾意色彩繽紛設計。雖然其中一個場景我穿上黑色衫拍照，但加入後期設計就變成Pop Art風格，亦係我好鍾意嘅風格，我屋企都會掛Pop Art。」
