區瑞強（Albert）、周國豐、麥潤壽、鄭子誠將於本月底舉行《DJ殿堂電台歲月演唱會2026》，今日（3日）舉行記者會。Albert透露演唱會賣點，「唔係只係聽歌，聽佢哋講嘢都係好有吸引力嘅節目，仲要喺現場可以交流對答，甚至可以即場點唱，係個好融洽嘅聚會，我構思咗10幾年，機會真係好難得，到時我會同佢哋三位分別都有合作。」
麥潤壽表示當年離開電台曾被聽眾投訴，「佢哋話我殘忍，因為聽咗我節目10年，突然停咗佢哋唔知嗰段時間可以做咩。」他強調本身並非唱家班，反而更愛彈結他，「我真係好少唱歌，包括唱K，但係我會得閒練吓結他，自從我發現咗木結他都可以用電，凌晨三、四點都可以練。」
Albert直言難得邀請到鄭子誠獻唱，鄭子誠笑說：「唱歌呢個大鑊，全晚演唱會嘅亮點，我驚搞到個演唱會蒙羞。」Albert提議：「不如搵周國豐現場畀燈，呢個環節一流。」子誠請周國豐手下留情，「我面皮好薄，我哋識咗咁多年，點都畀到5盞燈啦！」周國豐即冷淡回應，「但係我係好冷血㗎！」
周國豐亦會開金口獻唱，他直言雖然當年參加過《新秀歌唱大賽》，卻非愛唱歌之人，「參加《新秀》係媽咪想我入行，我性格唔適合入行，點解我會咁快選擇做幕後就係因為咁。」周國豐表示Albert邀請他時，即一口答應是有其原因，「今次有另一個意義，因為係講電台歲月，我同呢3位主持人，雖然喺同一間機構工作，又認識咁耐，但真係未合作過，而且呢個音樂會可以分享返同聽眾一啲點滴，有啲係比較感性或者令人感動嘅關係，好少有機會喺節目到講到，不如喺呢個音樂會加埋相關嘅歌曲講返出嚟，好似成件事會更加完整。」
更多現場圖輯：
