「華星三寶」梁漢文、陳奕迅（Eason）和楊千嬅，為「華星唱片」成立55周年合體，受訪「星塵55」節目分享當年同車趣事，回味在「華星」大家庭成長的點滴，三人碰頭即雞啄唔斷，現場充滿笑聲。
當年三人經常同坐一架「華星」保母車四出宣傳，Eason說：「千嬅最慘，因為佢自己化妝要早兩個鐘起身，公司車第一個接佢，再去接Edmond，佢哋喺九龍，最後過海接我，因為『華星』喺灣仔。收工就放低我先，千嬅最後先落車，返去仲要落妝，即係最遲休息，好慘。」千嬅笑說：「乜我咁慘咩？嗰陣唔會諗蝕底，覺得有得做就好好！」
「華星三寶」外號，他們表示是當年高層吳雨被街頭小食「煎釀三寶」啟發。Edmond說：「嗰陣我哋差唔多時候plug歌，一齊上唔同嘅節目做宣傳，成日都一齊做嘢，然後就醞釀咗《大激想》出嚟！」千嬅說：「我哋好勁㗎，乜嘢舞都識跳，鳳陽花鼓都跳過！」Eason和Edmond手舞足蹈，千嬅在旁笑說：「依家啲關節唔係好掂，跳唔到！」
令Eason和Edmond最難忘，是拍《大激想》廣告當晚發現成為雜誌主角，Eason說：「嗰晚喺西環拍通宵，千嬅埋位拍嘢，我同Edmond踎喺電車站無聊揭雜誌，見到寫我哋『不和』，好好笑！」
Edmond說：「其實『華星』有一種特別氣氛，就好似一間音樂學校，好有系統，透過歌唱比賽，然後咁多年幫呢班歌手做咗好多歌、推出好多唱片，令到佢哋有成就，一代一代咁傳落去，亦維繫到一班歌手嘅感情。」Eason補充：「其實連幕後都係有呢種感情，好似一班舊同學。」
對於舊事，三人有些記得有些又混淆或忘記了，Eason問千嬅當年「心口有個勇字」何來？千嬅說2001年《叱咤樂壇流行榜頒獎典禮》，首奪「叱咤樂壇女歌手獎金獎」感言：「我乜都冇，淨係心口有個勇字！」千嬅續謂：「因為你哋走晒，走淨我一個！」
當時華星改組，歌手們都離開了，千嬅還記得公司大老闆約她去傾公司改組一事，聽到已沒有唱片部，她十分驚呆。不過Edmond卻記得自己才是最後走的一個：「我喺沙漠拍緊《西遊記》（齊天大聖孫悟空），收到個Message就係華星Close。」千嬅才知原來Edmond是最遲離開公司的歌手。
