教育局已於六月一日，透過郵遞方式將小一統一派位結果，連同《小一註冊證》發放予家長，有位家長接到結果後，大失所望，因兒子只獲派第十個選擇，不知如何是好，經由朋友介紹，走來找我面談。以下為家長與我對話。派位不如意的家長，宜細心閱讀以下內容，從而找出一個解決方法。
「趙」為本人 「家」為派位不如意家長
家：趙sir，我個仔派得好差，唔知點算？
趙：佢派得點樣差法？
家：我幫佢填咗十幾間學校，佢頭嗰幾間派唔到，只派到第十間我唔係幾鍾意嗰間，人哋話嗰間係「寶」校，即係冇人想要嗰種。
趙：你有啲失望？
家：係囉，我對個仔講，「唔使驚，我會幫你搵間好啲嘅。」
趙：個仔點樣反應？
家：佢冇乜反應，佢好似唔知嗰間係「寶」校咁。
趙：你似乎冇同佢一齊揀學校。
家：係。我同太太幫佢揀嘅。佢係冇參與，我而家應該點做？是否需要到派到嗰間「寶」校註冊？又是否需要話俾個仔聽，因為嗰間學校差，所以要同佢叩門，搵間學校代替？我預備同佢扣十間八間學校，叩到好為止。
趙：我明白你的心情。你做咁多嘢，都係想個仔好；但你有冇諗過，話俾佢聽派嗰間學校差有乜嘢後果？
家：冇喎。諗深一層，如果我咁講，個仔應該唔鍾意嗰間學校嘅。
趙：冇錯。其實嗰間學校可能有好的一面，成績可能麻麻，但品德培養可能好呢？但你一口咬定間學校差，佢一定信你。萬一你叩門失敗，佢就要喺這間學校讀六年，你話佢點捱呢六年？
家：又係喎！我唔應該咁講，我應該對個仔講間學校都讀得過，我幫佢叩門只係想搵多一兩間學校俾佢揀，係咪應該咁講？
趙：係呀。你好快明白我講乜嘢。好，如果係咁，你是否需要叩成十間小學咁多？叩門重點，係要作出充足的準備，而唔係叩得多就算好。我想知道，你個仔係慢熱抑或快熱？
家：佢屬於慢熱嗰種！
趙：如果屬於慢熱，你至多同佢叩三至四間就夠啦，頭嗰一兩間幫佢熱身吸取經驗，第三間佢狀態會提升，至多第四間佢狀態大勇，應該考到㗎喇。
家：咁我而家是否要同個仔去辦理註冊就讀手續？
趙：一定要。因為程序上，係先註冊後叩門。叩門成功之後，再到先前註冊嗰間學校取回《小一註冊證》俾叩門成功嗰間小學，就功德圓滿啦。
家：咁我而家個心裏有個底，知道點做咯！
趙：可否複述一次？
家：首先我應該返屋企，同個仔話同朋友傾過，派到嗰間學校都唔錯，但係想俾多一兩個選擇佢，所以就幫佢扣門，但我唔會扣咁多間，因為叩得多佢會疲累、會厭戰；我寧願幫個仔準備好啲，精選三至四間就足夠啦。
趙：係呀。貴精不貴多，況且，叩得多，一日可能要面試幾間，時間難分配，個仔會疲倦；都係扣三至四間够啦！
家：明白。叩門要有程序、要有步驟、要諗吓個仔精力同埋能力是否足够應付，先至係正路。不過如果派得唔好，叩門又叩唔到咁點算呢？
趙：咁都唔使驚，香港而家係實行緊「九年強迫免費教育」叩唔到門，搵唔到學校，你都可以九月頭去「教育局學位分配組」嗰度講俾佢哋聽，佢哋自然會派間學校俾你個仔㗎。
家：咁都冇咁驚，多謝趙sir指點。
趙：你而家已經把握到叩門精髓，心理準備充足，鬥志昂揚，返到屋企同個仔傾吓，幫佢準備下然後去叩門，應該成功機會好大。祝你叩門成功，小朋友派到心儀小學。
家：多謝趙sir。