去年八月，吳文忻（Nathaliie）於《明周》公開乳癌復發第三期，並擴散至淋巴腺，其後一直積極面對治療；今年二月，細胞變異擴散到尾龍骨變乳癌第四期，左胸腫瘤有變大跡象，心臟及肺部積水，留醫十六天後，吳文忻說她走過鬼門關，更因為醫生一句說話，令她第一次感受到死亡。
在這一年的養病期間，吳文忻可說是關關難過關關過，由一度要坐輪椅、撐拐杖，現在行得走得，她亦為自己定下兩個目標，一是出自傳、二是出歌，她兩樣都做到了！新書《因愛重生》將在下月書展推出，她把病前病後所有經歷都娓娓道來。
上周三（18日），阿Nat吳文忻到中環為新歌《重生》錄音，她比之前精神飽滿了，步行亦沒有太大問題，錄音前接受《明周》訪問，她說︰「自從在《明周》公開咗（乳癌復發）之後，外界反應其實令我好surprise，你都知啦，我本身都諗住一次過講晒，之後就唔使煩，唔使再同每個人逐一去交代，諗住收埋自己專心做治療，但講咗出嚟，大家反應係好支持同好有愛，老實講，同我之前認識嘅世界好唔同，點解嘅？『吳文忻』入咗行咁耐，從來都冇試過有咁多人支持，當然，大家係出於同情心和愛心，但呢份愛真係愈來愈大，無論係識嘅朋友、唔識嘅朋友，喺街度大家見到我真係會講『文忻加油呀！』好真實！我亦好大感受，因為呢份愛都係我嘅動力！」
吳文忻曾經因風水改名為吳忻熹，在這一年間，她坦言在無助的時候，都有一段時間滿天神佛，「我細個係好虔誠天主教徒，直到大個咗，尤其入咗娛樂圈，唔係講笑，接觸過好多唔同信仰，亦因為呢個病，有段時間真係好慌，跟住點好呢？身邊亦有好多朋友俾好多提議，又見咗好多唔同師傅，但化極都化唔到，花咗好多錢；直至今年二月留院，喺醫院我記得返細個成日都好怕黑，有時好驚嘅時候，我通常都會祈禱，我就會平靜返，所以依家返去天主身邊，心靈唔平靜嘅時候，我就會祈禱。」
喺個心度插條喉入去
這次留院，阿Nat足足過了十六個可怕的夜晚，「呢一轉真係好似喺鬼門關行過一圈，有一日醫生問我，我記得佢幾靚女，佢話你應該都要諗定，『到時』幫唔幫你拔喉？我仲未get到佢想講乜？跟住佢就講咗句話，俾我就會拔，都好似俾咗個signal我，自己狀況唔係幾好，好接近喇……我當時自己個心態都唔係咁worse，不過就真係好痛，喺個心度插條喉入去，嗱，我仲要係望住整個過程，跟住我望住醫生，病人個心理質素都要好強，全程望住，就咁樣插入去，佢喺附近打咗少少麻醉，佢話唔好意思，通常我哋會俾個眼罩，因為我戴住頂帽，啱啱笠到對眼，佢以為我睇唔到，哈哈！」因為癌細胞擴散到尾龍骨，這一次阿Nat在醫院做了五次電療，「出院後兩個月都好痠好痛，整個lower back都痛，嗰陣時行路好痛，好驚以後一路都係要咁，係有少少擔心，依家OK，所以我好感恩！」
問阿Nat身體最新的情況？她說：「癌指數CEA同CA15就去返正常level，但正常level唔代表cancer free，醫生都話係based on下一次照PET Scan時，睇下照到乜嘢！我上一次係二月照，都要隔半年左右，現在已經是第四期，其實我都有聽一啲醫生講過，我有個朋友都係第四期，有三位醫生就同佢講話，就算佢PET Scan照到係冇cancer，但都suggest佢化療化一世嘅，因為可以其實仲係有啲，只係照唔到出嚟，同埋因為通常cancer一翻發，就好犀利！」
阿Nat的新書名為《因愛重生》，她說自傳就是想把最真實，毫無保留地說出來，由患病、家人、事業、婚姻、投資、孩子與宗教，全部與大家分享，她的目的是希望把自己的故事，給予同路人送暖寄愛，也想送給滿身傷痕，或在脆弱困惑中的人。
她邀請了十二位好友為新書寫序，包括Sammi鄭秀文、張衞健、謝安琪和張繼聰夫婦、馬浚偉、李珊珊、向海嵐、小學同學彭秀慧、同屆港姐梁珮盈以及周大福慈善基金主席鄭家成等。阿Nat特別感謝Sammi在這段時間給予的鼓勵，「我都係膽粗粗邀請Sammi寫序，佢super nice同埋好快手，一口答應之餘，竟然第二日就俾埋我，唔怪得知佢可以有咁嘅地位，佢真係改變咗我，雖然佢係基督教、我係天主教，但喺書入面啲chapter有講到，呢段時間有啲可能唔係咁好經歷，佢呢份愛全部cover晒，令到自己正面去面對，其實我去到呢個stage，我覺得自己真係跨過晒之前好迷惘時期，最主要係依家心靈好安靜，同埋真係100% positive，覺得會好返，佢嗰份愛係好touch到我！其實我pick up返咁多運動，都有部分係因為Sammi，我記得佢IG寫過一句說話『自律等於自愛』，我嗰陣時諗，自律係咪等於自愛呢？因為我其實係一個唔係好自律嘅人，以前做乜都係睇mood，想做就做，佢嘅行為有inspire到我，最近去push自己做返多啲運動，因為之前冇咗好多muscle，因為cancer cell食了好多muscle，我要食多啲蛋白質，然後就要做返啲gym去鞏固啲肌肉。」
早前Sammi更邀請阿Nat看她在澳門的演唱會，兩位「網友」在台上台下第一次見面，Sammi見到阿Nat，更停在她面前唱歌，給予她極大能量，「之前連行路都唔係好方便，連出街去睇醫生都有些困難，每一個movement都好痛，尾龍骨有好多神經痛，我直頭變咗阿婆，要好慢好慢動作，所以我擔心買咗飛，最終都去唔到！直至之後情形好轉，終於出到街，再嘗試問下佢公司睇下仲有冇飛？竟然安排到我去睇尾場，第一次見面真係好感動。」
花絮攝影︰伍敏慧
化妝︰Jenny Tziong
形象︰Ceci.S
