三位女神第一天拍攝時提及的擇偶條件，都與最後的配對選擇不謀而合！Maggie：「人品好最緊要，心地善良，風趣幽默，跟住孝順都好緊要，因為我覺得佢識得孝順屋企人，佢自己會對屋企人好。」Yuki自認是外貌協會：「安全感，因為我係好冇安全感嘅人，初期我要你俾到好大嘅安全感我，我去到後邊先可以繼續同你建立。」Sophie：「善良，或者照顧人嘅心好緊要，最緊要係佢有責任感，佢係會為人著想。其實我鍾意細眼嘅，我由細到大都鍾意偏向細眼嘅男仔。」當監製問Sophie行內哪位藝人眼睛特別吸引時，Sophie當時已提及GM：「曾展望細眼都幾靚仔、笑起上嚟幾陽光。」
在曝光的絕密真實約會片段中，GS繼續如幕前般甜蜜，除了睇個演唱會都冤氣過人、在車廂內的超甜蜜餵食片段。無論哪個約會Moment都保持甜美笑容及腰果眼的Sophie，最後Round Up時，不但坦言最大收穫是GM，還向着鏡頭鼓勵GM一起為二人的愛情努力：「我最開心係收穫咗GM啦，成個旅程都好美滿，但愛情唔係淨係得甜，愛情係要細心經營，我好期待喺呢啲粉紅泡泡背後，我哋點樣繼續去努力維繫呢件事，我希望GM你可以同我一齊努力。」並搞笑地指《女神》節目有劇本：「好多人話《女神》係咪有劇本呀？我想講係有囉，係個天寫俾我同GM嘅劇本。」
至於在節目中選擇拒愛的Step，揭出內心最真實的想法並哭成淚人：「我覺得自己其實有少少驚咗拍拖，（哽咽）……都真係會諗到底我問題出咗喺邊呢？點解每一次拍拖最後尾都會失敗㗎呢？可能我曾經都會有遇過『喲！係呢個人！』……甚至希望去到談婚論嫁階段，但係最後都係唔Work」、「我覺得所有男仔、啱啱認識你、追求你時，一定會對你好好、會盡佢所能去討好你……」說到此處，Step已激動至無法說下去。Sophie見狀加以鼓勵：「可以戀愛腦，但唔可以冇咗自己。」主持林盛斌（Bob）則苦口婆心著大家要長大，並總結談戀愛有時候是賭一鋪：「喺我角度，每一次拍拖、戀愛、甚至去到結婚，大家都係賭一鋪，邊個話到俾你知依家呢個人一定係Mr. Right？」Step最後不諱言，經歷了《女神》整個拍攝過程後確實成長不少、也為此感恩。
