入行二十五年，方力申（Alex）將舉行首次紅館個人演唱會，名為《最佳時間》。
小方解釋有雙重意義；一方面是他游泳生涯追求的「最佳紀錄」，另一方面，是他人生最幸福的此時此刻。
近年由運動員轉型藝人，十隻手指都數唔晒，小方算是始祖，但在當年其實並不被看好，甚至有網民把他的名字「斬頭」變成「万刀甲」，諷刺不會有「出頭天」，對此，小方從前十分介意，想不到用了二十五年才得到釋懷，遲到好過冇到，因為應該重視的人，一直都坐在泳池旁的觀眾席。
上年小方以四十五之齡參加世界先進游泳錦標賽（World Aquatics Masters Championships），在男子45至49歲組別表現出色，奪得200米背泳金牌（2分16秒84）及400米個人混合泳金牌，成為「雙料冠軍」。全家人包括太太葉萱（Maple）肚裏的BB，齊齊飛去新加坡為他打氣。小方直言比賽那一刻，他感覺彷彿回到十幾歲，每次比賽全家人都坐在觀眾席，「遊完之後，我突然覺得，原來呢個畫面就係我最幸福嘅時刻。」他感慨︰「我希望女兒長大後，仲可以看到爸爸在台上得獎，或者至少在紅館後台陪我一起分享另一個重要moment。」
小方當年以「飛魚王子」之名殺入樂壇，在游泳池信心十足，但在舞台上就另一回事，「以前嘅我，未必敢做一個音樂會，以前有好多嘅顧慮，驚自己啲歌唔夠，驚自己講嘢唔叻，咁就婉拒咗好多個演出，直至二四年舉行了七場內地演唱會《SHOW UP》。」算是累積了一些經驗，也讓小方鼓起勇氣申請紅館，「以前從來冇諗過自己會有機會再做show，更冇諗過可以開到紅館，依家心態唔同咗，有得做就一定要做，因為你永遠唔知會帶你去邊個方向。」
小方續說︰「以前做運動員心態，一定要做到最好先俾人睇，但其實我哋做任何事都好啦，其實唔需要做到好先至拎出嚟，其實係要先做，再慢慢去進步，以前往往連第一步都唔敢去踏出，唔好話做藝人呀唱歌呀，就算游水都好，以前我都會覺得，游水比賽、教游水、甚至泳賽旁述，都唔輪到我啦，有世界級嗰啲啦，點會輪到我去講啫，但係慢慢你會發覺，其實只要你肯做，你一定會有知音人，最重要係人要有進步，唔需要一做就要做到最好，要去同人比較，You don’t have to be great to start, but you need to start to be great.我廿一歲出道，Paco(黃柏高)叫我學乜我都唔肯學，佢叫我學功夫我又唔學，因為我嗰陣時仲係運動員，我同Paco真係會咁講，我話Paco，冇一個人廿歲出嚟去學一樣嘢係會成功，因為我嗰陣時係運動員心態，運動員廿歲已經係巔峯，我入行嘅時候，我已經喺體育班俾人叫老將，心裏面就認定呢個係必然，依家過咗廿幾年，有時諗返，其實都冇人叫你去打功夫，打到要好似吳京咁樣，叫你學琴，冇人要你彈到演奏級喎，叫你試吓做啫。」
這個心態的確會影響事業發展，入行二十五年，今次竟然是小方第一次在香港售票的演唱會；過去在內地巡唱時，小方收到很多歌迷在網上點唱，原來知音人一直都在身邊，「佢哋揀到五六七首歌，係今次紅館唱三十幾首歌都冇，原來我咁多歌可以上台唱嘅咩？咁所以依家樂迷心態又唔同囉。」小方在內地第一場騷後，收到一封歌迷信令他印象深刻，「佢話好開心終於睇到我好認真喺台上唱歌。」這句話，讓他反思過去習慣「娛樂大家」的心態，現在更想做一個真誠的表演者。「初時我都好愕然，雖然我冇開音樂會，但我都有唱歌，原來歌迷想睇嘅唔係做商演、唔係主持上身去娛賓、亦都唔係你唱緊歌觀眾飲緊酒嗰啲演出。作為一個藝人，其實過去咁多年都慣咗，尤其是香港嘅藝人，我哋慣咗服務觀眾，娛樂大家，我又做過《美女廚房》，對住鏡頭就慣咗帶歡樂俾大家，而唔係一個表演者囉。」
已經十六年沒有推出新唱片，上一張唱片仍有與鄧麗欣合唱的情歌《七年》；在千禧年，他們的情歌唱得街知巷聞，包括《十分愛》、《我的最愛》、《好心好報》等等，加上電影的助攻，當時更掀起一片合唱歌的熱潮。二人分手後，這些歌也變成了回憶，但這些集體回憶在演唱會上如何處理？去年Stephy開紅館騷，就請來林峯跟她合唱《好心好報》、小方在內地巡唱時，也邀請過林夏薇、胡定欣、鄭融等合唱這些經典。
不能否認，兩人開騷大家明知合體機會渺茫，但起歌時仍然有點期待，對於大家的「期待」，小方坦言︰「總之嘉賓就唔止一個啦！合唱歌就睇反應啦，今時今日有好多可以處理方法嘅，可以有嘉賓同我唱啦，亦都可以有觀眾幫我唱啦，亦可以有大合唱啦，同埋呢，例如大家唱最多《好心好報》、《好好戀愛》，咁其實本身都係我自己嘅獨唱歌嚟嘅，咁獨唱都得啩。」為了這次紅館騷，身在英國的好兄弟雷頌德為小方炮製了一首新歌《万刀甲》，除了是一首可以在舞台跳舞的快歌，更是小方的「心聲」。
「万刀甲」這個名字，源於○一年網上的論壇，那時小方剛由運動員轉型藝人，網民將「方力申」三字「斬頭」的惡搞花名，寓意他不會出人頭地，嘲諷意味，小方說︰「初時我係好介意，仲刻意同公司講，以後唔好提我係運動員轉型，我係歌手、係演員。」當時的他還以為，只要自己不提，別人就不會講，結果卻把自己困在更深的自我懷疑裏；現在的他不再介意，「我叫力申，就係要用力先至伸返個頭出嚟嘛。」新歌不只講他自己，更勉勵大家面對困難要努力突破，「正如香港人尊重本地運動員，因為知道背後付出好大。」他希望聽眾聽到這首歌，不僅感受到現場氣氛，更感受到那份「用汗水換肌肉」的堅持。
面對網民評價，小方坦承年輕時確實很介意，現在太太會比較留意關於他的留言，「我自己都會睇，但已經比後生時介意少咗好多，我仍然會嬲、會有情緒，但最了解自己，始終是自己同身邊愛我的人。最近PO女兒相片，有人留言『原來佢係好爸爸喎，我改觀咗。』他就回覆：「其實你都唔識我，點解要對我改觀？」另一個例子，小方當時游環島泳，「有人寫『你真係好犀利，抵你以前有咁多緋聞！』其實他們只是看到我們的表面，我應該留返啲精神同力氣，去愛錫我愛的人，而唔係去討好一啲根本唔認識我嘅人。」
