陳家樂、陳庭欣、關楚耀、何浩文、甄澤權今日（30日）出席「動色味蕾・營出未來」活動，陳家樂說近排同太太一齊學跳舞，一學即有回報兼派上用場，「原本跳舞都係玩吓，因為太太搵咗老師學跳舞，佢話晒都係全能歌手，想自我增值，將來如果有跳唱歌，都可以派上用場，我見佢咁俾心機挑戰自己，所以我都學埋一份，其實我人生最怕係跳舞，因為入行時跳得好差，有挫敗感，一直都有陰影，所以見到太太咁俾心機，自己都要努力，點知近排接到有角色需要跳舞，之前一星期都有拉兩三日筋，欲練神功必需拉鬆，因為有咁嘅準備，而家我聽到音樂會捉到拍子同步法。」
問到同門師姐阿Sa日前宣布婚訊，他即封口，「唔好問我，我唔可以講，而且我同大家同一時間先知，所以好驚喜，我哋本身藝人同老闆有個群組，大家都祝福佢。」
4月23日是他與太太連詩雅結婚三周年，太太早已為他準備驚喜，「咁就三周年，好快呀，但開心，因為我哋好快有BB，唔覺就已經三年，但我衰，每次都唔會有準備，但佢已經接受我嘅唔準備，而佢會準備，今次都係佢搵餐廳，（買禮物？）我會買但會問清楚佢想買咩，咁樣比較好，唔會買錯，但太太買俾我就會係驚喜，因為佢知我想換電腦，我幾個月前只講過一句，一直記喺心，佢買咗gift card俾我，我自己去揀。」他表示近日為了照顧家庭已減少踢波，「少咗踢波，因為又要準備開工，連波都少踢，再唔睇小朋友，佢就唔理我，有時一日唔同佢傾偈，第二日佢就唔叫我爸爸仲會專登唔理我，𠵱家啲小朋友好叻，有時唔係真係整親，但會扮整親，想吸引注意力。」
更多現場圖輯：
