洪天明與周家蔚傳婚姻出現問題，二人相繼否認後，本周日（6日）二人以「夫妻檔」洪天明和周家蔚上《大師兄Welcome Summer大激戰》，全程拍住上玩遊戲、默契十足！先說「水中大電視」環節中，二人不但同心協力做出「心口碎大石」、「打尿震」、「槍戰」等多款高難度動作，洪天明更趁其他人專心玩遊戲時，偷偷孭起周家蔚氹愛妻開心，恩愛爆燈。之後於「水上障礙大賽」，周家蔚整濕衣衫運冰水時，由於不夠力扭極扭不出水，洪天明見狀即出口「護花」：「我可唔可以幫佢㗎？」說畢即熟手地幫周家蔚脫掉濕衫，還笑言「呢個我拿手」，既體貼又搞笑。
節目另一個亮點落在「黑馬」湯盈盈身上，大師兄錢嘉樂踢爆愛妻盈盈為了上節目相當上心：「佢知道可以入嚟我哋度，即刻做咗三日Yoga！」結果皇天不負有心人，盈盈成功在新遊戲「大龜大龜跳」中，憑「手腳猜枚」為「獎門人好友」贏得漂亮一仗，以一人之力連續KO了「主持隊」6名隊員，獲錢嘉樂封為「烏龜MVP」。看似對愛妻窒頭窒勢的大師兄，其實亦十分著緊盈盈，眼見盈盈玩遊戲意外跌低時，錢嘉樂即「護妻狂魔」上身大叫：「唔准笑！唔准笑！」又在其他環節狂俾貼士兼向盈盈「打眼色」，認真偏心！
