方力申的紅館騷是事業的「最佳時間」，終身伴侶和家庭也是。小方和葉萱（Maple）三年前在親戚介紹下認為，小方強調︰「不是相睇，是自然偶遇。」問小方是否一見鍾情？「對我嚟講係嘅。」反而Maple因為他過去緋聞多多，有所保留，但很快被小方的認真打動。「原來一開始，就算一齊嘅時候，佢都話唔係十分認真嘅，但係我一開始嘅時候，我已經係好認真㗎喎。」
太太的過往，曾是媒體的焦點，「呢方面我覺得佢好真誠，佢以前嘅事件，我哋未見面嘅時候已經同我講晒，我覺得佢好勇敢、好誠實，頭先你問我係咪一見鍾情，咁我都有衡量過嘅，跟住就開始約會囉，認識之後就覺得佢同我過往認識嘅人好唔同，佢係比較簡單，我同佢去歐洲旅行，諗住帶三個喼，其中一個空喼，但係返到嚟嗰個喼都係空嘅，佢鍾意傾偈同quality time多啲，呢方面係幾特別嘅。」
太太曾是信仰詐騙的受害者，但小方從不視她為「蠢人」，「即係今時今日，就算電騙都好多人上當啦，用一個電話咋喎，更何況係會利用到一個人嘅信仰，又或者佢嘅單純，再加上長年累月去接近接觸，其實你問我會唔會上當？我覺得係絕對會喎，我唔覺得呢樣嘢係一個蠢嘅人先至會上當，電騙都有好多好叻嘅人都會上當。」結婚後，太太仍要面對外界壓力，「開始有啲人會話佢想識我因為我係藝人，所以佢想識我佢想出名。咁所以佢會比我更大壓力，咁我都因為啱啱開始好快就已經曝光，我都要用好大嘅努力，去俾佢睇到我唔係玩玩吓㗎，我係認真㗎，我哋兩個一路行都唔容易嘅，中間都會有好多嘅拗撬、唔信任，但最緊要唔好太在意外界嘅聲音，咁就過咗三年，結婚之後大家都成熟咗，依家亦都係我哋嘅最佳時間。」
