林峯繼以《尋秦記》「寡人」造型拍攝港鐵新一輯新鐵路廣告《尋．未來記》後，第二集今日登場，並變身「管家佬」，跟「常在心」鍾嘉欣重演《溏心風暴》經典CP，並召喚已長大成人變成大隻仔的「打波先嚟落雨的四眼仔」鄭仲軒，跟林峯合演經典橋段。
林峯透露：「當年我拍《溏心一》時本來諗住淨係客串，同埋未試過一個角色淨係負責拍拖，嗰陣日日都係同嘉欣一齊開工，點知拍拍下愈嚟愈多場口！但其實都好開心嘅，因為可以創造咗令觀眾記得嘅角色！」
久未與林峯合作拍劇的嘉欣，一見到管家佬的經典格仔恤，昔日回憶即時湧上心頭：「嗰陣嘅《溏心》系列對我哋嚟講，事業上真係幫咗好多。所以到依家廿年後，都仲可以走返埋一齊，拍返一個好似續集咁樣嘅廣告，感覺都好奇妙！其實我十九歲嚟香港嘅時候，已經開始搭港鐵，因為我覺得好方便，可以好清楚知道幾多點會到目的地。同埋我鍾意周圍睇唔同階層嘅人，觀察佢性格、心態呀、佢哋做嘅嘢。所以輕輕五分鐘，我自己摸索、學到好多嘢！」
嘉欣仲話平時搭港鐵，如果有化妝會大方示人，素顏時就「頭耷耷」冇人認得出：「我平時都會帶小朋友坐港鐵，因為呢個係香港嘅特色！同埋我會話俾佢地知，媽咪係靠坐車學講廣東話，好似『將軍澳、旺角』，可以睇到好多中文字，又試吓擺啲銀仔買飛等等！」
