自劇集《新聞女王》首播後，除了飾演主角文慧心Man姐的佘詩曼好評不斷，飾演不畏強權「中立派」張家妍的李施嬅同樣贏盡正評，獲封「矚目女二」，「民望」與Man姐叮噹馬頭。網民除力推阿佘及施嬅榮膺「雙視后」外，內地更掀起「心妍CP熱」，網民笑指二人鬥氣及鬥戲，令人想起經典劇《宮心計》楊怡VS阿佘的名場面！
繼《公主嫁到》後相隔十三年再與阿佘合作，施嬅激讚阿佘EQ高：「劇本好多時係之前一、兩日先有，阿佘係好專業但又識得放鬆嘅演員，會覺得（大家）係兩個極端，我做完嘢要返屋企休息同背劇本、比較緊張啲，但佢就會話：『我哋今晚完咗一齊出去食飯』。其實好多年前見佢做人已經好大得着，就算通告好密都EQ好高、好有禮貌對人，唔會投訴同黑面。」
談到演記者獲讚入型入格，施嬅笑言自己「有排未夠班」：「好難同真記者比，做咗呢個角色先知做主播、記者好難，臨場反應要快，做live on air唔可以NG，難過做演員好多，我對跑新聞嘅人佩服得五體投地，自己睇住啲稿讀新聞都覺得繞口，真係拍馬都追唔上，自問做真記者未夠班。加上讀稿就算有字幕機都睇唔切，所以要一早背晒啲新聞稿，都算係一個大挑戰。今次仲要喺好壓縮嘅時間好趕咁拍、又要拍好多場，冇乜時間做準備功夫。不過辛苦得嚟成個團隊好開心，拍攝中途會一齊食飯、唱歌，令我領悟到自己要轉變吓工作嘅心態。」
施嬅又預告角色之後將有重大轉變：「佢喺一集之內會有好大嘅轉變，因為呢套劇嘅劇本唔會交代好多嘢，所以可能幾場戲觀眾就會見到我無端端變化好大，呢個位係難拿捏嘅…我記得化妝同梳頭工作人員睇完（個變化）都好嘩然！我無端端變咗咁，個個都好驚訝！」
