戀愛綜藝真人騷《女神配對計劃》繼第一集曾展望向葉蒨文（Sophie）勇敢告白贏盡好評、感動萬千網民後，昨晚（15日）播出的第二集再有經典粉紅場面登場，就是有「王浩信2.0」之稱的林俊其（Kris），勇敢向暗戀多時的羅毓儀（Yuki）真情告白。
Kris一來已目標清晰地向心儀女神Yuki勇敢告白：「我覺得佢每做一件事都會好驚、同埋都會諗好多嘢，所以就阻住咗佢行前一步。但我想講你相信自己就可以；同埋如果可以嘅話，我想做你輔助。」不過由於Kris沒開名，女主角Yuki全程除了疑惑零反應，幸得Sophie出手幫忙撳燈，讓Kris有出場表白機會。最終Kris在主持林盛斌（Bob）引領下，講出心儀女神是羅毓儀Yuki，令全程沒有想過自己就是女主角的Yuki大為震撼：「我依家個心跳得好快，我以為你講緊Step（李芷晴）。」
Yuki稍作鎮定後追問Kris：「但你幾時開始…（鍾意我）？我哋都識咗一段時間？」Kris聞言害羞地笑說：「坦白講都有留意好耐㗎喇，直到有次公司大型show見到佢有個位唔夠高拎嘢，佢嗰個動作係咁嘅（說畢即作踮腳趷高伸手狀），跟住我好想過去幫佢…」並冧爆表示喜歡Yuki「成日笑」！之後Kris行到Yuki面前、以極溫柔聲線繼續情深告白：「我個人都比較慢熱少少嘅，希望可以慢慢咁樣靠近你，希望唔好好似啱啱咁，一嚟就嚇親你。」全程冧到面紅紅的Yuki，眼泛淚光兼含羞答答回應：「唔會呀，我其實好開心…因為…嗯…er…嗯…係喇，好開心。」說畢更忍不住抬頭以水汪汪的大眼睛望向Kris，至於Kris亦是全程甜笑不斷，青澀程度猶如初戀告白現場，引發全場女神瘋狂尖叫，Yuki則害羞大叫救命：「完未呀？呢個環節！」
由於輪到Kris出場時，Yuki的三個心動名額早已爆滿，為了令Yuki想清楚會否為Kris動用「換人」權利，Kris在Bob要求再度作出超動人真情剖白：「因為我覺得Yuki係一個需要多啲陪伴鼓勵，可能佢鍾意睇戲、睇動漫、或鍾意食某啲嘢，我都會陪佢先。我希望之後如果你有好多煩惱，又或者做嘢方面嘅嘢，我會想同你一齊研究、一齊去進步，希望有呢個機會。」令原本已心動不已的Yuki再度失守，Yuki：「死啦，我感動到想喊！（哽咽）其實我唔係好估到，其實我哋叫做冇乜交集，但你好似好了解我咁。」
Yuki事後接受製作組訪問時，亦為Kris如此了解及包容自己感動至數度哽咽：「佢不單止睇得出自卑嘅我，我覺得佢直頭包容咗呢樣嘢，甚至乎係因為呢樣嘢鍾意我。我估唔到會有人鍾意咁樣嘅自己，所以佢咁講我嗰下有啲激動。」最終，Yuki決定放棄只有21歲的康嘉泰，將其中一個位置讓給Kris；當Yuki上前為Kris配戴「心動頸鏈」時，二人雖然都顯得怕怕醜醜，但期間還是忍不住一再甜笑及甜蜜對望。
另外，對梁敏巧（Maggie）窮追不捨的Babyface的終極結局，亦在網絡引發極大迴響。以奇趣見稱、被坊間指是「升呢回歸」的Babyface，出動完四大爆笑冧女絕殺後，Babyface亦聽命收起幽默，向Maggie說出情深的一句：「多謝你一直以嚟嘅鼓勵、包容，我會不停進步，我會未來對你更好。」之後他更堅定地表示，今次會是他最後一次爭取追求Maggie：「如果今次失敗咗，咁就算數喇，我會尋找一段新嘅戀情！」
Maggie最終仍是決定拒絕Babyface，但仍不忘讚許Babyface：「你係好好嘅人。」得悉最後機會幻滅，Babyface雖眼泛淚光，但仍信守承諾離開海選舞台：「多謝你（Maggie）鼓勵，我會做番自己能做嘅事情」、「好遺憾，但盡咗力，唔得就係時候要邁向下一個階段！」對於Babyface由「求愛貼身膠布」、180度轉變成不帶走雲彩地灑脫離場的真男人，現場所有女神都為之動容，關嘉敏更忍不住標淚，連她自己亦大為震撼：「我為咗Baby Face喊呀？！我初頭覺得佢係Kam，但我發現佢企咗喺度好真誠咁同你講哩，佢真係認真㗎喎！」
