吳偉豪（Ricco）與胡敏芝，今日（15日）為劇集《非份之罪》進行街頭快閃宣傳，吸引一班fans風雨下到場支持，幸好最後都找到安全位置舉行活動。吳偉豪今次於劇中首次演奸角，他就表示自己都覺得有少少「衰格」，「我覺得角色表面唔太衰，都會為對方好，但係心底有私心做嘢，咁就比較最衰格！現實中唔多唔少都會遇到呢類人，但又未去到咁衰咁誇張，所以都可以將自己身邊好多不同遭遇，不愉快或不太理想中的事，盡量抽出來擺在戲內，不過現實中應該冇咁衰嘅人！」
劇集上周收視最高達21.3點，問到Ricco可有壓力？他說：「有呀！剛收到公司通知，話昨日收視比上星期更好，希望再升啦，唔好因為我奸而跌，我演奸都冇所謂，我演得好放，冇太多顧慮，我只係演員，冇咩偶包！今次演得好爽，現實中做唔到，從來未演過，所以好享受。」他表示處境劇《愛·回家之開心速遞》，日前眾演員入錄音室唱歌，「全劇已拍完，尋日大家入錄音室錄音，因為太多人，所以每人只可以唱少少，算係有個小小彩蛋，大家一齊唱首歌，希望大家會留意，唱歌對我唔會太難，但都會緊張。」
問到胡敏芝，對戲外吳偉豪的感覺如何？她就大讚對方，「佢同劇中角色唔似，因為呢個男仔好衰，佢現實係好乖同陽光，現實中我都會鐘意壞男人，好似有少少吸引力，但只可以少少壞，唔好做傷天害理，如果外表比較壞，但內心善良都好吸引，我喜歡反差比較大！」
