力臻（Lagchun）與Michael C早前推出《你是我的專屬配對》，柔情對唱成功發放「米臻式浪漫」氛圍，更被熱捧成「米臻」CP。兩人乘勢推出新作《做好戀愛的覺悟》，甜蜜值再度升溫！前日（16日）「米臻」齊齊現身銅鑼灣舉行《做好見「米臻」的覺悟》簽名及見面會，除了與樂迷玩遊戲、欣賞MV首播外，更是他們首次於現場演繹新歌！
活動以「米臻」合唱《你是我的專屬配對》開始，濃濃BL感秒間急升，隨即兩人與樂迷玩遊戲繼續炒熱全場氣氛。接下來，是這對CP親自分享對新歌的感受，兩人對再度邀得作詞人T-Rexx為他們的BL情歌推進劇情，感到興奮又難忘。他們笑指兩首歌分別與對方相似：「一首係我、一首係你嘅 version！上一首係Michael較少接觸嘅風格，今次就輪到力臻比較陌生，更加係第一次嘗試嘅類型。感覺我哋喺音樂上火花又再昇華咗！」提到「米臻」CP這個稱呼，力臻說：「最緊要 fans鍾意，因為大家嚟聽，我哋先有機會繼續唱。」兩人又在台上大爆相處日常，除了會齊齊做gym，更會邊視像邊食飯，果然夠晒「恩愛」！
然後是「米臻」的現場演繹時間，首次公開獻唱新作《做好戀愛的覺悟》，有別於《你是我的專屬配對》的台式情歌口味，這次他們以J-POP曲風塑造日系少男情懷，為「米臻」CP添上清新浪漫感。演唱過後，力臻與Michael C當然不會錯過與樂迷互動的機會，再次與大家玩遊戲。
終於來到樂迷最期待的新歌MV首播環節，為綻放BL粉紅泡泡的魅力，兩人於MV中濕身演出之餘，更有不少親密動作，身貼身、頭貼頭的場面，惹來不少尖叫聲！為配合新作的日系感，「米臻」早前特意到沙灘取景，分享拍攝點滴時，兩人異口同聲表示對沙灘有陰影，力臻笑言這次為 了MV豁出去，但指的不是與Michael C的親密互動，他說：「細個去沙灘割到腳，嗰吓真係好痛！自此我就覺得沙灘有啲污糟，所以好少去，為咗呢個MV真係好大犧牲㗎！」身旁的Michael C隨即和議，「我都有喺沙灘嘅慘痛經歷，衝落海嗰陣，唔小心俾貝殼割傷搞到入院，仲要打針，係我人生第一次call白車！」力臻又指：「嗰日仲要唔記得咗要濕身，著咗條深色內褲，但條面褲就白色嘅，所以次次上水都要盡量避開我嘅深色內褲，導演好勁！大家可以睇十次個MV，然後放大又睇十次，就有可能搵到我條深色內褲。」他們笑言為了MV，一同克服陰影，也算是「米臻」CP的另類緣份。
今次MV以大海為主題，自然不乏若隱若現的透視騷肌畫面，兩人透露在開拍前，早已成gym buddy瘋狂操肌，一齊節食、一齊做重力訓練、一齊做機，令兩人的默契升溫，但Michael C竟然鬼馬自爆有偷懶，「其實我覺得今次都未去到100%，因為都未需要除晒！」力臻立即幫口：「佢好想除晒㗎！如果今次反應好，下次福利就可以加碼！我除埋褲都仲得！」於活動尾聲時，力臻感觸哽咽道：「感謝Michael！於爸爸離逝時一直在身邊陪伴度過低潮，亦樂見歌迷支持兩人組成 CP。」他又表示與Michael以CP組合出歌反應很好，今天可以一同舉辦歌迷簽名及見面會，當作是一份父親節禮物送給天上的父親。
