鄭欣宜早前推出新歌《先哭為敬》，大獲好評，她最近邀來有份作曲的Serrini（梁嘉茵）一起合唱，推出「尾班車Version」，並租了一輛電單拍攝MV，負責歌曲填詞的黃偉文及作曲的許崇謙也有現身打氣。
欣宜與Serrini於頒獎禮同場後，惺惺相惜，不少網民希望她們能合作演出，之前一直只是「網友」，拍攝MV當日才首次正式見面，兩人會面一見如故，欣宜表示：「我有睇Serrini嘅演出和MV，好鍾意佢嘅歌聲和風格，感覺我同佢好似來自同一塊料子裁出嚟咁，雖然各有風格但又好夾，所以我同公司講好想同佢合作，終於等到佢嘅Demo，一聽就好鍾意。可能唔輸得嘅性格，見到『男人歌』三個字就偏要唱。」
欣宜拍攝時心情大好，不時向途人揮手，又扭腰跳舞，Serrini初時比較含蓄，但電車駛到運動場附近，她與欣宜竟細聲講大講笑並手指指，原來在𥄫靚仔。欣宜說到與Serrini初次見面，大讚道：「好羨慕佢條腰，我無啊！」Serrini很坦白：「呢個係腰封嚟嘅。」Serrini就覺得欣宜皮膚好和有自信。
欣宜與Serrini異口同聲表示長大後不會隨便流淚，Serrini只會在睇電影或跟朋友聊天時才會感觸到眼泛淚光，欣宜很認同，說道：「我依家亦好少因為辛苦或傷心而喊，反而會為別人將負面情緒轉化為正面力量，堅強奮鬥，我會感動到喊。」
點擊放大睇更多MV花絮：
