由陳豪、張曦雯、馬貫東、丁子朗、劉佩玥（Moon）、譚凱琪、馮皓揚、郭柏妍、游嘉欣、鄭子誠等主演的無綫新劇《俠醫》。
阿Moon在劇中飾演「機心拜金女」沈綺婷（阿Nat），是羅穎琛（張曦雯飾）地產公司同事兼閨密。雖然阿Nat表面對經常甩碌的阿琛照顧周到又體貼，但實質不但經常放阿琛暗箭；表面扮晒好心的阿Nat，為了錢更暗地搶走阿琛不少生意。阿Nat除了是名副其實的「綠茶婊」，為了錢不惜一切，更視自己的完美Body及女性美為生財工具，為了搶到生意、賺到可觀佣金，不惜出賣肉體，當中最震撼三觀的情節，是她先後與鄧力圖（鄭子誠飾）及鄧世鏗（丁子朗飾）發生關係！
為了令觀眾開劇前對阿Nat有進一步了解，無綫官方社交網今早釋出了一條搶先睇預告，身穿黑色貼身裙的Moon不斷扭動腰肢及擺弄秀髮，加上迷離眼神，狀態誘人。之後，阿Moon更「大腳趷起」大晒招牌長腿，令人相當期待。談到新劇角色要周旋於不同男人之間，當中與「善良暖男」馬貫東及「超級奸仔」丁子朗最多瓜葛；阿Moon搞笑地以「享盡齊人之福」形容自己，並指自己至少與六個男角色有親密關係，「有丁丁、馬貫東、陳豪、Patrick Sir、鄭子誠，同埋嘉輝哥。」阿Moon續指阿Nat的角色其實很立體，令從演多年的她亦感到演繹時有難度，「首先佢係一個好識得去利用人心嘅女仔，對住唔同人，佢會識得戴唔同嘅面具，去爭取對自己最大嘅利益，就算要犧牲色相都唔係一個問題。而阿Nat變成咁，同佢嘅童年同埋成長都有好大嘅關係，一個壞人背後嘅故事，其實都可以好淒慘。可恨之人亦有可憐之處，喺沈綺婷嘅世界入邊其實好難有愛，因為佢唔相信任何情感，唯有錢先至可以畀到最大安全感佢。」
至於演開陽光直男的丁丁，這次畫風突然飾演「殺人放火、姦淫擄掠」做齊的超級奸仔，而且更是衣官禽獸的類型；為了個人利益，就連老豆（鄭子誠飾）都毫不在乎，而且為人完全欠缺同理心，為了利益極度不擇手段，丁丁坦言今次這個富二代角色是「壞人之中的壞人」，還感激編劇「寫到咁多嘢畀我」。
由於鄧世鏗是重點角色，為了創造新一代奸人經典，台前幕後可謂落足心機設計。以丁丁為例子，除了煲勻無綫經典奸角的演出偷師外，更在拍攝現場向「無綫十大奸人」之一的鄭子誠請教，丁丁說：「我今次係參照咗好多TVB經典反派嘅演繹嚟做，對我嚟講係好大嘅挑戰同突破，可以話係考牌之作。所以我都做足好多功課，同睇咗好多唔同嘅電影；希望洗走到觀眾之前覺得丁丁係陽光男孩嘅形象，喺演員路上殺出到條新嘅路。」丁丁續指與劇中父母鄭子誠及江欣燕是「反派三人組」，「我哋三個都有唔同嘅奸法，但我係奸得嚟深思熟慮嗰隻。好想多謝兩位前輩，佢哋教識咗我點樣去揣摩見到人哋折墮就開心嘅狀態，呢個係純奸角嘅諗法，都真係幫到我去突破咗個樽口。」
