Jaco好識冧契媽。
陳山聰囝囝Jaco於6歲生日正日開派對，契媽佘詩曼因為要工作，未能出席，於是Jaco要求夜晚食飯，但只限他與契媽兩個人食。阿佘昨晚（6日）在社交網上載與Jaco慶祝片段，並留千字文詳述整個過程，錫到Jaco燶。
阿佘表示：「五點收工即刻去買蛋糕、蠟燭、同生日卡。因為佢話要我揸車，所以買齊嘢即刻飛返屋企揸架車去接佢。一上車我就整蠱佢，送咗隻毛毛兔仔俾佢做禮物（佢講明話要Doctor Strange），我就係想睇佢勁失望嗰個樣，點知佢掩飾得好好，仲開開心心咁同老豆（竇）say bye，然後我哋直奔冒險樂園」。
阿佘貴為視后，陪住Jaco玩雪、射槍、玩波波池、碰碰車，玩到關門都未捨得走，夜晚九點都未食飯！「然後佢話要食麥當勞（心諗：唔係玩嘢係嘛，我收工化晒妝點搞呢？)不過冇計啦，正所謂生日大晒，所以我哋最後就去咗食🍔🍟～」，阿佘在片中問Jaco生日願望，Jaco冧爆阿佘說：「契媽日日同我食飯！」
阿佘表示原本想在漢堡神偷做背景前切蛋糕，可惜個位有人坐，跟住她開車去屋企附近的公園，進行簡單而隆重的切餅儀式。「當佢以為差唔多要返屋企嘅時候，我叫佢打開車頭冚，其實係想俾驚喜佢嘅，因為佢期待已久嘅Doctor Strange，我一早已經收咗喺入邊，佢見到當然好開心啦！」片段中Jaco開心到啜啖契媽。
最後阿佘更謂：「嘩，今日超長氣呀……其實仲有好多點點滴滴都好搞笑、好可愛嘅，只係不能盡錄，希望佢會記得六歲生日嗰年，有我呢個契媽陪佢過啦～」！
