伍詠薇為代言產品拍宣傳照，伍姑娘認為保持最佳狀態，最重要是心態，「我諗每個人都會話，要飲食均衡、健康，但係我覺得出發點係心態，你嘅態度要有喺度，係正嘅，先會去做。」問伍姑娘可認為自己是人生勝利組？她笑說：「如果話失敗，我唔覺得係Loser，但係我又唔覺得自己係Winner，喺中間我覺得自己係享受嘅，有時輸下又好開心，有時贏下又唔好太盡，我永遠會留啲空間畀自己，上得太高，我怕自己返唔到轉頭，我真係咁嘅人嚟。」
伍姑娘坦言有鑽牛角尖的時候，「我都會放負㗎，咁我會選擇喺屋企打個坐，去呼吸。我成日都講，個天安排咗好多功課，每個人都有功課做，我都有功課做緊，唔使死嘅，船到橋頭自然直，加油，諗吓辦法。」
伍姑娘表示入行多年，每個階段有不同嘗試：「我好享受做啲同自己性格唔同嘅人，我有時間就去睇戲、睇書，出街嗰陣望吓人，喺人哋度『偷嘢』，拍戲嗰陣隨時攞嚟用。」至於音樂方面，伍姑娘自言屬多元化，「咩歌都會聽，仲有伍詠薇囉！雖然我冇Gin Lee咁勁，但係我有我風格，其實我都幾鍾意唱歌。幾年前已經有人邀請我搞Mini Concert，我覺得需要一個時機，同埋主題好緊要，我為咩搞呢個音樂會呢？我會思考吓，但係又唔好思考太耐，再等就89歲啦，我都想可以快啲發生。」
