《女神配對計劃2》本周日（13日）播映第二集，五位女神何沛珈（Roxanne）、阮嘉敏（Mandy）、陳若思（Amber）、俞可程（Kanis）及郭珮文（Juliana），將撳燈挑選心水求愛勇者！今屆求愛勇者入圍標準有兩個，第一是得到三位或以上女神撳燈支持，第二是自己心儀的女神有份撳燈挑選自己。
這一集「閨密花生團」成員曝光，Roxanne 的閨密是游嘉欣、Mandy的閨密是鄧依婷、Amber的閨密是劉倬昕、Juliana的閨密是鄧凱文、Kanis的閨密是其親家姐，家姐指Kanis是「容易受傷的女人」，「見到佢每次分手都好受傷害，所以今日特登嚟決心幫佢搵一個好男人。」
劉倬昕公開Amber的海量擇偶條件：「佢鍾意高嘅、叻嘅、脾氣好、皮膚白、眼大、唔肥、斯文、怕醜，最緊要係天秤座！」游嘉欣半搞笑半認真指Roxanne鍾意「搵年紀大」，並在爆料期間再度展現她的招牌論盡：「我覺得佢應該適合五歲以上」，阿Bob聞言即更正為「大五歲以上」。鄧凱文及阿Bob踢爆Juliana好鍾意食嘢，其中阿Bob的「指證」最搞笑：「我哋拜完神好多燒肉，佢食咗半盒呀！佢真係好鍾意食嘢。」
今集第一位登場的，是以健碩身形、擁41吋胸肌、成功人士外表及搞笑「龍舟論」引發關注的關經翰Oswald ，他在海選面試期間，曾坦承自己有一夜情經驗，隨即引發5位女神關注，Amber聞言坦認介意：「我覺得係觀念問題，有一次就會有好多次。」Mandy：「我比較介意衛生同佢冇做安全措施多啲。」Kanis：「One Night Stand喺我心目中有少少扣分」，之後更追問Oswald：「如果伴侶介意，點畀番信心？」Roxanne獲游游肉緊致電教路：「我覺得你揀咗先，雖然佢One Night Stand，但我覺得佢個人都成熟穩重，我覺得不妨了解一下。」Oswald會否因為一夜情關係被眾女神叮走，要留待節目內揭曉。
關經翰曾經參加TVB在2024年舉辦的《我推的野男LIVE！》，任職投行經理的Oswald被稱為「筋肉霆鋒」，自言由細到大都「坐唔定」，他的運動履歷驚人，本身為新西蘭國家體操隊，贏過新西蘭全國青少年男子藝術體操全能冠軍，2022年又贏過香港LCSD社區網球甲級聯賽亞軍。他認為做野男應具備的條件是︰「唔同情況都都要有自信同諗法，有能力面對唔同挑戰。」Oswald自爆在中年女士圈都甚受歡迎，鬼仔性格的他笑言︰「媽咪啲姊妹auntie都好鍾意我，之前拍拖女朋友嘅媽咪都好疼錫我。我比較吸引到中年女士。」Oswald當時成為大熱門之一，最終殺入4強。
更多關經翰圖輯：
更多《女神配對計劃2》圖輯：
部分圖片來源：關經翰@instagram
