薛家燕將於29日舉行《薛家燕愛你無限 60 年演唱會澳門站》，前日（5日）家燕受邀到澳門路環瑪大肋納安老院進行探訪，與一眾老友記傾偈、唱歌，氣氛樂也融融。
家燕姐甫入安老院，已獲眾人熱烈歡迎，唔少老友記大讚家燕姐靚女，家燕姐搞笑地話：「係呀，我愈做愈靚，係粒癦大咗啲啫，好多人都叫我做大粒癦⋯⋯佢哋係值得尊敬嘅長者，社會有今日嘅成就，係靠佢哋創造出嚟，啲哥哥姐姐年紀大咗冇乜要求，需要人同佢傾吓偈、關心吓佢，所以我見到你哋係我嘅福氣。」
期後，家燕姐又與老友記逐一握手及噓寒問暖，場面十分溫馨！佢仲即場加插唱歌環節，為大家獻唱《萬水千山總是情》，其中一位年近80歲嘅長者亦清唱一曲《朋友》送俾家燕姐。
有老友記覺得家燕姐瘦咗又靚咗，家燕姐笑言：「我係清減咗啲，每餐都食少少！」
其實為咗準備演唱會，家燕姐上月已開始節食減肥。務求以最fit狀態演出，就算去到澳門馳名的餐館，面對肥美嘅芝士海膽焗波士頓龍蝦、炸乳鴿，都要忍口！