前亞視女藝員龐秋雁與廖啟智相識多年，對他的突然離開感到很難過。她與智叔的相熟，除了跟陳敏兒同是基督徒，好姊妹的關係，也是因為一起在浸會大學教戲劇，她說：「智叔有約我飲茶傾偈，了解到我嘅背景，除咗因為係演藝學院畢業，又是舞台劇演員，同時我哋都喺電視台做咗好多年，又識得幕後嘅嘢，他才邀請我一齊教戲劇，好感謝佢喺呢十幾年裏面，我經常有唔識嘅嘢都會向佢請教，問佢意見，除咗係前輩，佢諗嘢好仔細，係一個好可靠嘅人。」
在浸會一起教戲劇的日子裏，龐秋雁覺得智叔很用心教導及疼惜學生，會將自己的本領傾囊相授，也難忘他的一句格言：「佢經常強調做戲等於做人，學做戲都要諗諗點樣學做人，呢句話影響學生，同時影響咗我。」在龐秋雁的印象中，智叔沉默寡言，每每問他問題，他總是想很久才會回答，「佢係一個好小心嘅人，唔會隨便亂咁講嘢，好沉靜，好沉實，我相信作為演員來講，佢真係諗得好仔細才會呈現出來。」
