今年「29+1」的Tyson Yoshi（程浚彥），踏入三十而立的階段；這一年發生很多事，被好友背叛、經歷大地震、求婚成功成為人夫，充滿驚喜的三十歲，他說︰「每逢二十、三十都好似會有些轉變。」
回想「19+1」，是Tyson玩得最瘋的年紀，「不過到廿幾歲已經覺得好攰，要玩過玩夠，先知道唔適合自己，就算我將來有小朋友，我都會覺得『早啲玩啦』，應該癲嘅年紀就去癲，如果三十歲先玩，我就覺得好大鑊，係一條單程路，唔會返轉頭。」下一個階段，Tyson希望在三十五歲可以做爸爸。
男人三十是事業起飛的年紀，但對於飛行的快感，Tyson並不享受，「我畏高，甚麼跳傘、BUNGEE JUMP都冇玩過，可以唔搞就唔好搞喇，唔係好鍾意離心力，有一次搭飛機以為就快降落，點知降落一刻，機師急速拉返上去，又冇announce，我淨係識得問咩事咩事，不過，如果要講真係驚，今年就經歷一場天災。」
今年四月三日，台灣花蓮發生7.2級地震，當時Tyson正身處台灣，「當時喺台北個屋企，住十幾樓，真係覺得自己會死，朝頭早八點幾，全屋嘅櫃門開始啪啪聲，又開又關，當時自己一個人，可能始終香港長大，之後就去英國，兩個地方都唔係地震區，唔知要做啲乜，即刻WhatsApp問班friend，他們話要開門，但震到連行去門口都行唔到，原來喺呢啲情況下，係乜都諗唔到，屋企又冇一張真係匿埋到嘅大枱，又瘋狂餘震，最後我挨住個雪櫃邊頂到最後，其實真係驚。」事後Tyson馬上捐出新台幣一百萬（約港幣廿四萬）協助救災，這次親身經歷令他第一次感受生死，希望為災區重建略盡綿薄之力。
Tyson與台灣很有緣份，他的音樂路亦在這個地方開始，有天他如常上班，當時他在一個化妝品牌做店舖設計，突然間，手機的Instagram追蹤通知不斷彈出，「原來係高爾宣（台灣饒舌歌手）轉發了我首歌《Christy》，電話不停咁震，因為本身IG冇乜人follow，普通正常人IG咁囉，突然間咁多人follow，又收到好多DM，心諗大鑊啦，唔通俾人擺上連登？我記得之後去台北The Wall開第一次音樂會，九百座位好快賣晒，我冇做過任何宣傳，唔知行乜運，其實呢，我一直覺得有實力嘅大有人在，但有運嘅人好少，所以我係好感謝呢一個機會。」
Tyson台灣有一班好兄弟，高爾宣和TRASH樂團主唱阿夜（Marz23）都先後宣布當爸，連婁峻碩也快做人夫，幾個外表都叛逆、不羈的新一代型男，都選擇一早成家立室。
「我唔知其他人，我以前都玩得癲，我諗十九、二十歲左右玩得最癲，不過我好快就完，廿幾歲已經覺得好攰、好煩，仲有咩好玩？首先我唔係好飲得酒，會酒精過敏，一飲就成身都紅，瘋狂痕，跟住又勁頭痛，之後個腦就熄機，第二日好攰好唔舒服，係囉，已經玩過玩夠，就覺得唔適合自己，就算我將來有個小朋友，我都會覺得『早啲玩啦』，應該癲嘅年紀就去癲，如果三十歲先玩，我就覺得好大鑊，係一條單程路，唔會返轉頭。」
Tyson十三歲到英國讀書，見過不少例子，「我十三歲就已經過咗去英國，所以我好習慣有自己空間，要regulate自己生活，身邊有好多中五、六之後先過去讀書，咁就好大鑊，突然間有啲錢，屋企人一定俾多啲使費即刻買架二手車，唔返學，去賭場去溝女，到最後就連畢業都畢業唔到，點解呢？就因為太遲又突然間擁有自由，我覺得應該愈早想玩就玩，起碼知道自己鍾唔鍾意，至少經歷過、體驗過。」
一班年紀輕輕的「人夫」，現在的聚會是做甚麼？「我哋依家嘅聚會？冇㗎，就係做gym寫吓歌去錄音室，我去台北，通常淨係去一間火鍋店打邊爐，食好lean冇乜肥膏嘅牛肉，健身火鍋，依家連食都幾健康，跟住咪傾吓偈就散band㗎喇，佢哋鍾意打機咪打機，我自己返屋企囉。」
今年六月，Tyson在加拿大溫哥華舉行個唱，拍拖六年女友Christy也同行，他為Christy唱新歌《Would You Be Mine？》並邀上台，突然跪地求婚，Christy感動流淚答應。
攝影協力︰Kapo Blue
花絮攝影︰洪志富
髮型︰Jim Tse @hair Corner
化妝︰Carmen Chung
形象︰Tung Kam
形象協力︰Haley Chau
服裝︰BOTTEGA VENETA、FENDI、GIVENCHY、LOUIS VUITTON
珠寶︰MIKIMOTO
