鍾至權透露King Sir喜歡的娛樂，就是約朋友打麻將。
鍾景輝（King Sir）於6月3日安詳離世，享壽89歲。「戲劇大師鍾景輝追思會」今日（15日）在演藝學院香港賽馬會演藝劇院舉行，追思會以King Sir生前最心愛的戲劇之一、懷爾德（Thornton Wilder）編劇的《小城風光》（Our Town）風格作為主軸，帶領出席嘉賓回顧他對戲劇藝術的無私奉獻。
追思會由King Sir的姪兒鍾至權（Dennis）率先代表家屬致辭，他說自小爺爺就叫他稱呼伯父做伯爺，今日想繼續沿用伯爺稱呼他，「3點15分，伯爺一生守時，我今日特登戴住佢最鍾意呢隻表，我想戴住呢隻表，代表King Sir多謝大家咁多年來嘅愛戴。」
Dennis表示在很多觀眾心目中，King Sir是一位戲劇大師，他在熒幕上的演出，都是很精靈的老人家，或是很多人生道理，但在家除非跟他講戲劇，否則他很少說話。在家King Sir會食宵夜、寫稿等，他最喜歡的娛樂，就是約朋友打麻將。「但到咗最後兩年，伯爺已經冇精神再同朋友打足四圈麻將；咁屋企人陪佢打啦，我記得每一次喺屋企打麻將，因為啲冷氣風位問題，次次都安排我坐喺King Sir下家，而每一次我叫糊嘅牌，伯爺都係扣實晒嘅，所以次次都係我輸嘅，好彩我哋冇計錢，娛樂下啫。伯爺仲好鍾意做牌，嗰次佢做咗副十三么，佢仲食出咗，嘩！嗰次佢真係好開心，不過我記得有一次佢仲開心嘅，係我結婚嗰陣，我同老婆斟茶俾佢飲，佢笑得更加燦爛。」
Dennis續謂King Sir到了今年，已再沒有精神打麻將：「到最後一個禮拜，我拎咗副麻將，同佢啲學生，同佢一齊砌咗副十三么，嗰次伯爺好開心。」Dennis透露King Sir一直都很希望戲劇在中學成科，甚至再成為計分科，因為King Sir說過一個戲劇訓練不止教做戲，還教做人，皆因需用同理心去了解角色的遭遇和生命，並能培養人的自信心，跟人的眼神接觸、咬子清晰，及團隊精神都是很重要。
Dennis自言讀工程，其實不明為何伯爺想戲劇科成為計分科的重要性，但至近年AI發展愈來愈厲害，好多人擔心被AI搶走飯碗，可是AI無論多厲害，都要人類去溝通；AI可計到最完美答案，但計不到不完美的人的痛楚和快樂，他舉例說：「如同AI打麻雀，我食咗十三么，佢都係唔Care，所以一個好嘅戲劇教育，可以培育下一代成為一個有血有肉嘅人。」他說伯爺到了近幾年，已經沒體力再去劇院欣賞舞台劇，幸好有好多學生，會給他舞台劇的Link：「每一次當我哋播放俾佢睇嘅時候，當舞台嘅音樂一響起，燈光一打落去，伯爺當堂會精神晒，碌大隻眼咁望住個電視，好全神貫注咁欣賞演出，伯爺對舞台劇嘅熱愛同迷戀，真係由後生到老，都冇變過嘅。」
Dennis讀出King Sir的受權自傳封面內頁一段：「世界上一切一切，我真係覺得我嘅一生十分幸運，人生係好美好，因此我會用有限嘅時間，做最多嘅嘢，如果有一日我要走，我會唔捨得呢度嘅一切。」
最後Dennis透露伯爺臨走最後一日的情況：「喺離開前嘅幾日，每一日都有朋友嚟探佢，佢仲睇緊《金池塘》；到最後一日，學生嚟陪佢傾吓偈，食吓雪糕。學生走咗之後，佢留低俾大家嘅最後一句說話係：我今日好開心！」
