繼於廣州及佛山舉行「Remember記得・鍾嘉欣演唱會」後，鍾嘉欣（Linda）昨日（26日）假深圳寶安體育中心體育館舉行演唱會，雖然已馬不停蹄開到第三站，但觀眾反應一如以往熱烈，現場座無虛席。Linda今次邀請黎瑞恩現身站台擔任嘉賓，二人首次合唱經典歌《一人有一個夢想》，為個唱掀起高潮，而觀眾席上亦有楊茜堯、楊思琦、馬浚偉、苟芸慧等，現場星光熠熠！
過往Linda演唱會未請過嘉賓，今次特意邀請黎瑞恩驚喜現身，她解釋：「我嘅劇集及專輯歌較多，之前覺得未到時候邀請嘉賓，而我每次演唱會主題都希望帶正能量、一點愛畀其他人，今次覺得係時候請一位嘉賓，而呢位嘉賓，我想邀請一位對我成長有影響嘅人，而且佢嘅歌係要有正能量，於是就諗起黎瑞恩。」
從小於加拿大長大的Linda直言小時候廣東話欠佳，常靠唱K學習中文，在云云歌曲之中，每次都會唱《一人有一個夢想》，她認為這首歌充滿希望，讓她幻想到美麗的將來，「我細個夢想做演員歌手，唔知係咪成日唱《一人有一個夢想》嘅關係，吸引力法則，大個之後，竟然夢想成真做演員、歌手。」Linda又大爆現在亦會以唱K方法教授子女中文，《一人有一個夢想》是最常播的歌曲之一。
談到黎瑞恩為她站台，Linda憶述與小恩子相識於黎諾懿婚禮，當晚在婚宴相遇，聊了數句，發現對方親切友善，第二次再遇，是觀賞對方舞台劇，她更大讚對方聲線一流，渴望對方可繼續唱歌。為了邀請小恩子做個唱嘉賓，Linda託朋友找來對方電話，並親自發短訊給小恩子，想不到她一口答應，令Linda大感窩心，「佢嘅人生閱歷豐富，勇敢面對風浪，喺佢身上學習到積極前進，我非常欣賞佢。」
對於楊茜堯、楊思琦、馬浚偉、苟芸慧等前來捧場，Linda很開心演出獲得很多身邊人的支持，「每次開騷，我都希望邀請好朋友，或生命中跟我同行嘅人出席。」Linda指馬浚偉是她入行拍攝劇集《皆大歡喜》時首位認識的男藝人，兩人識於微時，馬仔見證着她成長，而當時馬仔對作為新人的她亦給予極大包容及耐心。她跟楊茜堯同樣識於微時，二人曾合作劇集《溏心風暴》，Linda欣賞茜堯個性爽直，縱使各自分隔兩地生活，仍然保持聯絡，大家亦會互相鼓勵，又會談論育兒經及分享私事；至於楊思琦，Linda表示：「好開心楊思琦嚟睇演唱會，初入行好多電視劇都係同佢拍，同佢有好多回憶，其實我哋已經幾年冇見面，今晚可以再次見番佢，真係好開心。」而另一好姊妹苟姑娘則是第二次到場支持Linda。
此外，今次Linda大女Kelly亦到場支持，她表示由於Kelly是第一胎，所以母女倆特別多感受，她說：「對Kelly好多感覺，好多歌曲靈感都係來自Kelly，能夠演唱會喺佢面前親口演唱專程為佢寫嘅歌《做你的晨㬢》，覺得好開心。」她還自爆下站演出將巡迴到惠州，並向粉絲預告：「2025年已有全盤計劃，2026年希望能夠喺香港開騷，咁就圓滿！因為香港係我建立事業嘅地方，亦係我成長嘅重要地，所以一定要喺香港開騷。」
