鄧兆尊登台曾遇瘋狂女粉 激動曬「大光燈」嚇到O嘴

 

 

葉童日前在內地遇瘋狂影迷疑被拉落車事件，再度引發藝人在公開場合遭粉絲埋身的安危熱議，官恩娜當年曾在商場出席活動時，突遭男粉絲箍頸強吻；更嚴重的是任達華於內地商演，被狂徒衝上台用利刀刺傷腹部，當場鮮血直流被急送院做手術。

鄧兆尊昨晚（21日）在與吳家樂、江美儀主持的網台節目，自爆曾遇驚嚇但超香艷事件。他說有一回去登台，唱到過場就走近台前跟台下觀眾握手，突然有女Fans走到前台，把衣服拉高過頸並興奮呼嘯，當他說到被「大光燈」掁眼時，江美儀即驚訝問：「吓，裏面冇咩呀？」家樂進一步問清楚：「裏面有冇燈罩？」兆尊說：「冇燈罩，大燈！（係咪開夜車用嗰盞燈？）係，冇錯！（係咪老爺車？）唔係老爺車，係新車。」

兆尊表示他身後的樂隊都被嚇到殺停音樂，個個都O晒嘴，他被掁了三四秒後，台下附近幾個女Fans幫手把衣服位低後才收科，並已隱沒在人群中，自此他不敢再走到台前，並有在台上勸喻Fans不要再做如此激動行為。