最近在內地很火的電影《給阿嬤的情書》，無論票房及口碑都大放異采，入場觀眾許多都喊濕大半包紙巾，被那種鄉情及當代生活的淒苦觸動，香港現在都有得睇了，你又睇咗未呢？
而楊千嬅近日出席微博之夜，與電影《給阿嬤的情書》兩位主角王彥桐及李思潼同台，一口氣唱了兩首歌——除了潮州方言電影主題曲《月下煮茶》外，大會更特意挑選了千嬅出道以來第二首創作的歌曲《字跡》，兩首歌巧妙連結電影主題，令全場動容。
隨後，她更專程走訪汕頭電影實景地，從樟林古港永定樓到張厝內老厝，展開一場沉浸式的尋根之旅，更驕傲地說：「我好驕傲我係潮州人！」
千嬅表示，成件事「好夢幻」——今年5月，她因為想了解家鄉上一輩的歷史情懷，已經入場觀看《給阿嬤的情書》，「睇戲嗰陣已經喊濕咗半包紙巾！真沒想到後來有緣份促成這次演出，將《字跡》與電影主題曲《月下煮茶》連在一起。我好希望可以將呢套戲介紹俾更多人睇到，希望香港可以多啲人會鍾意同去睇呢套戲，潮州人更加需要去睇。因為《給阿嬤的情書》唔單止是記錄一個年代的故事，更重要是承傳了潮州人家庭觀念、精神價值與生存之道。」
為了在微博之夜唱好《月下煮茶》，千嬅特別請父親教她潮州話發音：「成首都係佢教我發音，陪我練囉。因為咁，反而令我哋兩父女多咗溝通，佢又講番一啲以前嘅事俾我知。睇完戲之後又一齊傾偈分享以前嘅事，其實父母開心，我就會好開心，多咗一份溫暖。」她笑言：「潮州話有時搞笑似粗口，學講嗰陣我有時都笑到肚痛，好驚發錯音嘛。」
今次千嬅跟電影中兩位年輕主角合唱同台：「佢哋唔係專業演員出身，但電影入面已經演得好好，好有才華，冇諗過可以咁開心同佢哋合作唱潮州歌，感覺好親切，作為潮州人一定要支持返潮州人，『架己冷』咁。」
千嬅還特意去汕頭參觀一下「僑批文化展覽館」，她深刻領悟到老一輩潮汕人「僑批是比生命還大的信」那種精神。親身走進爺嫲一代的生活場景：「細個唔明白，今次重回故鄉，見到僑批，先知男人外面飄洋過海行船，女人睇住頭家，我爺爺都係其中一員。」又回憶起嫲嫲：「細個由於爸媽經常要外出工作，為了方便被照顧，很多時會去了嫲嫲屋企。以前佢封利市，一定喺上面寫滿字。睇完真實歷史，先知當年潮州人就係靠「信」與家人唯一聯繫。嫲嫲寫利市都係承傳以前傳統，希望我哋可以『平安健康，努力讀書』。」
她又提到：「我都識沖功夫茶㗎。嫲嫲教潮州人講『雷氣』（義氣），女人捱得、不怕蝕底、堅持到底！我嘅烈女性格，原來就係由細到大潛移默化培養出嚟。好感謝、好感恩。我好驕傲我係潮州人。」
