賴慰玲疑跟張振朗友情不再 自爆等出關約食飯慘被拒

賴慰玲（Winki）上月13日在社交網宣布細仔Kavis出世，昨日在社交曬照派豬腳薑之餘，亦在ig限時動態撩網民：「等緊出關，傾吓偈，問我」。

Winki與張振朗自劇集《反黑路人甲》成為熒幕CP，二人私下親密程度十足情侶，但沒傳緋聞。Winki曾在綜藝節目中訴真情，哽咽表示想跟振朗做一世朋友，但當有網民問到她幾時再同張振朗合作？Winki竟爆料：「我答你唔到，我唔係好肯定佢仲想唔想同我合作，事緣我哋約咗過幾日，我出關就幾個人一齊食飯，點知佢突然通過友人，話俾我知佢唔得閒就咁就取消咗，然後佢無話再約，無再聯繫我，我唔知我哋嘅友誼係咪已經逝去？你幫我問吓佢本人，在線等。」張振朗果然有回覆，但卻改了歌詞說：「可以笑的話不會哭，可找到自己那會孤獨。」Winki當然不收貨說：「佢呢啲回覆係：1.真心表達無奈，2.定係Hea我？繼續在線等。」

另外被問到產後身體復原情況，Winki貼上穿桃紅比堅尼拍的腹肌舊照說：「7、8成啦，行得走得識講笑囉，始終都算大手術，仲係第二胎，復原係慢啲嘅，離呢個狀態要啲時間，BUT要有信心，I WILL BE BACK！」

不過被問到出關後最想吃咩？她自爆生B前已好想食一個好吃的部隊鍋，但至仍未找到好吃的。

問到生第二胎有否感覺很不同？Winki坦言：「老實講，我唔驚嗰啲餵奶換片，身體可以慢慢調理，但…湊一個同湊兩個好大分別，湊一個可以好專心好細心，湊兩個成日好想平衡啲，成日覺得顧此失彼，每晚都會同哥哥傾偈，好彩佢真係好生性，好似已經做咗100次哥哥，不過今次遇正哥哥聖誕假＋新年假，要安排嘢俾佢玩，如果唔係，佢只可以玩弟弟啲尿片。」

更有問到她拿了政府的生仔2萬元獎賞沒有？Winki反問：「係咪要拎出世紙先有？我哋仲未諗到中文名，所以未去搞，有咩中文名提議？」

至於她餵人奶定奶粉？她說：「三樣都有：埋身、泵出嚟、奶粉。我嘅宗旨係：唔可以有壓力！講真，我好想盡量餵人奶，一來對小朋友好，二來話曬封肚，我會好唔捨得呢種親密，但又要顧及自己時間分配、奶量，上胎試過塞奶，真係痛過生仔嘅痛。」